Гулбаҳор САИДҒАНИЕВА: Қачон халқаро рейтингимиз баланд бўлади?

12.07.2020 16:07:21

Халқ билан мулоқот давлатимизнинг асосий сиёсий йўналиши этиб белгиланган. Президентимизнинг ҳар бир ўтказган йиғилишларида ушбу масала бирламчи ўринга қўйилганлигини кўрамиз. Давлат сиёсатининг асосида халқ билан мулоқот асосий ўринни эгаллайди. Жамиятимизда юзага келган муаммоларни бартараф этиш ва Ватанимизни ривожлантиришда давлат ва халқнинг бирдамлиги муҳим ўрин тутади.

Давлатимиз раҳбарининг Олий Мажлисга Мурожаатномасида бошқа жуда кўп соҳалар бўйича таҳлиллар ва белгиланган вазифалар билан бир қаторда жамоатчилик палатасини ташкил этиш ҳақида фикр билдирилган ва “Жамият – ислоҳотлар ташаббускори”деган янги ғояни амалда рўёбга чиқариш, аҳолининг давлат ва жамият ишларини бошқаришдаги иштироки кўламини кенгайтириш, БМТнинг Барқарор ривожланиш мақсадларига эришиш, фуқаролар, жамият ва давлатнинг ўзаро яқин ҳамкорлигини ўрнатиш, шунингдек, давлат органлари ва муассасалари фаолияти устидан жамоатчилик назоратини кучайтириш” белгилаб берилган эди. Эндиликда бу ташаббус амалга ошириладиган бўлди.

Куни кеча Президентимизнинг “Ўзбекистон Республикаси Президенти ҳузуридаги Жамоатчилик палатасини ташкил этиш тўғрисида” янги Фармони қабул қилинди. Бу тузилма энг аввало, жамоатчилик палатасининг ҳамда ҳудудий жамоатчилик палаталарининг юзага келиши давлат ва жамият фаолиятини олиб боришда фуқароларнинг иштирокини таъминлашга хизмат қилади.

Шунингдек, Фармон билан нодавлат-нотижорат ташкилотларнинг боши бирлаштирилди. Ҳозиргача давлат корхоналарида жамоатчилик кенгашлари бор эди, аммо уларнинг фаолияти қониқарли эмас эди. Эндидикда, уларга амалий ёрдам вужудга келди.

Энг муҳими, фуқароларнинг давлат ва жамият бошқарувида иштирок этишлари, ўз позицияларини билдиришлари учун минбар яратилди.

“Mening fikrim” веб-порталининг палата тасарруфига ўтказилиши эса, халқ билан мулоқотни чин маънода юзага чиқариш, халқ фикрини давлат ва жамият бошқаруви даражасига олиб чиқишга ёрдам беради. Айниқса, палата аъзолари орасида халқ билан энг яқин ишлаётган соҳа вакиллари - оммавий ахборот воситалари вакилларининг бўлиши ҳаққоний, адолатли тузилма ташкил бўлганлигини кўрсатади.

Демак, ушбу тузилманинг яратилиши билан фуқароларнинг муаммоларини тизимли ўрганиш имконияти пайдо бўлди.

Жамоатчилик палатаси фаолиятининг белгилаб берилган 12 та муҳим йўналишлари давлат, фуқаролар ва фуқаролик жамияти институтларининг тизимли ва самарали мулоқотини йўлга қўйиш, жамоатчилик назоратини амалга ошириш, халқаро ҳамкорлик ва бошқалар ҳисобланади.

Фармонда Жамоатчилик палатасининг жамоатчилик учун долзарб бўлган масалалар юзасидан ўтказилган ўрганиш ва таҳлил натижаларини ҳар чоракда Олий Мажлис палаталарига кўриб чиқиш учун юбориш амалиётининг жорий қилиниши белгилаб қўйилди. Бу эса, Қонунчилик палатаси депутатлари ҳам бу тузилма билан яқиндан ишлаши кераклигини билдиради. Бундай мустаҳкам алоқа, ҳамкорлик Олий Мажлиснинг ҳақиқий халқ уйига айланишига хизмат қилади.

Ҳозирги кунда 30 та халқаро рейтинглар мавжуд бўлиб, фуқаролик жамиятининг муҳим институтларидан бири сифатида Жамоатчилик палатаси ҳам Ўзбекистон рейтингини оширишда хизмат қилади. Халқаро ташкилотлар рейтинги бўйича ҳар бир давлатнинг ривожланишини баҳолашда фуқаролик жамиятига эътибор орқали амалга оширилиши муҳим. Ана шу вазифани тўғри бажара олсак, халқаро рейтингимиз баланд бўлади. Ушбу халқаро рейтингда Ўзбекистон ўзига хос юқори даражада бўлиши эса Давлат раҳбари кутган олий мақсаддир.

Бир сўз билан айтганда, фуқаролар манфаатларини ҳимоя қилувчи янги тузилма вужудга келди. Ушбу Фармон фуқаролик жамиятини шакллантириш учун кенг имкониятлар беради.

  

Гулбаҳор САИДҒАНИЕВА,

Олий Мажлис Қонунчилик палатаси депутати,

“Адолат” СДП фракцияси аъзоси

Улашинг!

Фикрингизни қолдиринг

Илтимос жавобингизни киритинг

+