“Адолат” сиёсий қарашларимни бойитди

Бугунги кунда ҳар бир фуқаро жамиятда сиёсий жиҳатдан етарли билимга эга бўлиши кераклигини даврнинг ўзи талаб этмоқда. Шу жиҳатдан олиб қаралганда, демократик давлат ривожланишлари сари илдам қадам ташлаётган юртимизнинг ҳар бир кишиси ўз сиёсий позициясини ўстириб ва шакллантириб бормоғи зарур. Албатта, бунда жамиятга кўпроқ фойда келтираётган сиёсий партияга аъзо бўлиш ҳам фойдадан холи эмас. Чунки, ўз йўналиши, халққа манфаат етказувчи аниқ мақсади ва дастури бўлган сиёсий партия фуқаронинг сиёсий билим ва кўникмаларини шакллантириб қолмасдан, балки, турфа хил муаммоларнинг ечимига ҳам хизмат қилади.

Мен Ўзбекистон “Адолат” СДПга 2017 йилдан буён аъзоман. Ўтган икки йил давомида партия менинг сиёсий қарашларимни бойитди, фаолиятимни ташкил этишда кўп жиҳатдан амалий ишлар кўрсатди. Хусусан, 2018 йил июль ойида “Мактабгача таълим – кадрлар тайёрлашнинг бирламчи бўғини” деб номланган партия лойиҳаси доирасида мен рахбарлик қилиб келаётган Гулистон шаҳридаги 19-мактабгача таълим муассасасида шахмат-шашка майдончасини ўрнатди. Бугунги кунда болалар бу майдончада мазза қилиб ўйнашмоқда. Ақлларини чархлашмоқда. Бу сиёсий партиянинг халқ ичида амалга ошириб келаётган ишларининг бир қисми десам, муболаға бўлмайди. Чунки ўзим гувоҳ бўлганимдек, партия депутатлар орқали жуда кўп инсонларга беминнат хизмат этиб келяпти. Энг асосийси, партия ҳар қандай соҳада, ҳар қандай йўналишда адолат тамойилларини устувор қўйиб, бунга эришиб келмоқда. Шу боис, бу йилги бўлиб ўтадиган Парламент ва маҳаллий Кенгашларга сайловларда депутатликка ўз номзодимни Ўзбекистон “Адолат” СДПдан кўрсатишга қарор қилдим.

Айтадиган ўз сўзи, аниқ йўналиши ва дастурига эга бўлган партия билан келгусида Ватанимиз тараққиёти йўлида хизмат этиш истагидаман.

Дилшода ТАНИКУЛОВА,

партия фаоли