Акмал Бурхановни табриклаймиз!

“Адолат” социал-демократик партиясининг Қонунчилик палатасидаги фракцияси аъзоси Акмал Бурхановга юксак ишонч билдирилди. Партиядошимиз Президент фармони билан Ўзбекистон Республикаси Коррупцияга қарши курашиш агентлиги директори лавозимига тайинланди. Ушбу ҳужжат Олий Мажлис Сенати Қарори билан тасдиқланди.

Акмал Бурханов 2015-2019 йиллар давомида Олий Мажлис Қонунчилик палатасидаги “Адолат” СДП фракцияси аъзоси бўлган. 2019 йилда бўлиб ўтган Олий Мажлисга сайловларда ҳам “Адолат” СДПдан номзоди кўрсатилди ва сайловчиларнинг ишончига сазовар бўлиб навбатдаги муддатга депутат этиб сайланди.

Шунингдек, Акмал Эшондедаевич 2019 йилнинг январь ойидан “Юксалиш” умуммиллий ҳаракатига раислик қилиб келаётган эди. 2017—2019 йилларда эса “Тараққиёт стратегияси” маркази ижрочи директори бўлиб ишлаган. У ташаббускор, қатъиятли, адолатпарвар, кенг дунёқарашга эга раҳбар.

2002—2007 йилларда Адлия вазирлигида турли лавозимларда ишлаган. 2009—2015 йилларда Нагоя университетининг Ўзбекистондаги ваколатхонаси ижрочи директори бўлган. 2012—2016 йилларда Ўзбекистон Республикаси Президенти ҳузуридаги Давлат бошқаруви академиясида ўқитувчилик қилган.

Акмал Бурханов мутахассислиги бўйича — ҳуқуқшунос. У 2001 йилда Тошкент давлат юридик университетини (бакалавр), 2003 йилда эса ушбу университетнинг магистратура босқичини тамомлаган. 2007 йилда Япониянинг Нагоя давлат университетида (магистратура) таълим олган, 2007 йилдан — Нагоя давлат университети докторанти.

Эслатиб ўтамиз, Президентнинг 2020 йил 29 июндаги «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги Фармони билан Ўзбекистон Республикаси Коррупцияга қарши курашиш агентлиги ташкил этилди.

Президентнинг 2020 йил 29 июндаги Қарорига мувофиқ, Агентлик директори мақоми, меҳнатга ҳақ тўлаш шартлари, тиббий ва транспорт хизмати кўрсатиш шароитлари бўйича вазирга тенглаштирилади.

Маълумки, “Адолат” СДП дастурида ҳам коррупцияга қарши кураш ва уни олдини олиш масалалари энг асосий йўналишлардан бири сифатида белгиланган. Акмал Эшондедаевич партия дастурининг ушбу йўнлишини ҳаётга татбиқ этиш бўйича экспертлар гуруҳи аъзоси сифатида ўз фикри ва таклифлари билдириб келмоқда.

Коррупцияга қарши курашиш агентлиги билан “Адолат” СДП мамлакатимизда ушбу иллатни бартараф этиш ҳамкорлик қилишдан мамнун эканлигини билдиради.

“Адолат” СДП жамоаси ва унинг кўп минг сонли аъзолари Акмал Бурхановнинг янги лавозимга тайинлангани билан табриклайди ҳамда келгуси меҳнат фаолиятида улкан зафарлар тилайди!

 “Адолат” СДП

Сиёсий Кенгаши