Андижонликлар коррупцияга қарши руҳда майдонга чиқди

Жамият ривожига тўсиқ бўладиган омиллардан бири коррупция. Жиноятчиликнинг бу турига қарши курашишда жамоатчиликнинг роли катта. Шу сабаб Андижонлик “адолатчилар”нинг “Коррупцияни илдизи билан қуритамиз!” шиори остида майдонга чиқишини жамоатчилик қўллаб-қувватлади.

Андижон тумани “Маданият ва истироҳат” боғида ташкил этилган митинг аввалида сўз олган Олий Мажлис Қонунчилик палатаси депутати  Муҳаррам Дадаходжаева таклиф этилаётган партиямиз сайловолди дастурида қонун устуворлигига алоҳида эътибор қаратилгани, партиядошларимиз томонидан жиноятчиликларнинг олдини олиш йўлида амалга оширилаётган ишларга йиғилганлар эътиборини қаратди.

-Бу ҳаракатга ёшларни кенг жалб этилаётгани бежиз эмас, - дея таъкидлади депутат М.Дадаходжаева, - Чунки биз фарзандларимизни маънавий соғлом инсонлар қилиб тарбиялаш билан бир вақтда ҳуқуқий маданиятини юксалтиришимиз зарур. Токи улар бу жиноятнинг юзага келиши ўзимизга боғлиқ эканлигини, коррупциянинг эртаси йўқлигини тушуниб етсинлар.

Саҳнада “Биз коррупцияга қаршимиз!” дея чақириқ янгради. Сайилгоҳга айланган майдонга йиғилганлар ҳам бу чақириққа қўшилди. Бу иштирокчилар сафининг янада кенгайишига олиб келди. Ёш актёрлар томонидан тайёрланган саҳна кўринишида уларнинг коррупцияга тиш-тирноғи билан қарши эканлиги, унга йўл бермасликлари ўз ифодасини топди.

-  Асака туманида ўтказилган митингдан кейин кўпчилик бизни қўллаб-қувватлай бошлади, -дейди Ўзбекистон “Адолат” СДП Андижон вилоят кенгаши раиси Мадаминжон Мадазимов, - Айниқса, талабалар ташаббуснинг фаол иштирокчиларига айланди. Вилоятнинг марказий кўчаларида кун ора “Коррупцияга йўл йўқ!”, деган шиорлар билан автобусларда “Ёш адолатчилар”нинг юриши ўз натижасини бермоқда.

Бир сўз билан айтганда, мақсадимиз жиноятчиликга йўл қўймаслик, илдизигача қуритиш. Коррупция ва партиямиз фаолияти мавзусидаги викторинада иштирокчилар ўз билимларини синовдан ўтказдилар. Амалдаги йил якунида ўтказиладиган сайловларда фаол иштирок этишларини билдирдилар.

Санъаткорларнинг чиқишлари митинг қатнашчиларининг руҳини янада кўтарди. Андижонлик сафдошлармиз бир овоздан коррупцияга қарши биргаликда курашишга қарор қилдилар.

     Акбаржон НАЗАРОВ,

Ўзбекистон “Адолат” СДП

    Андижон вилоят кенгаши матбуот хизмати