Бирлашиб биз катта кучмиз

Ўзбекистон “Адолат” СДП “Ёш адолатчилар” қаноти Республика Кенгашининг IV ҳисобот-сайлов конференциясини андижонлик “Ёш адолатчилар” катта қизиқиш билан кузатиб борди. Аввало шуни айтиш керакки, конференция жуда юқори даражада ташкил этилди. Бугун ёшлар масаласи давлат сиёсати даражасига кўтарилгани, Президентимиз томонидан биз ёшларга билдирилган ишонч зиммамиздаги масъулиятни янда ошираётганини янада чуқур ҳис этдик.

Шахсан мен “адолатчилар” сафида эканлигимдан хурсандман. Партия кўмаги билан “Ёшлар парламенти” аъзоси сифатида тайинланишим зиммамдаги масъулиятни янада оширди. Энди мен давлатимиз, Президентимиз номидан иш юритишим лозим. Амалга оширилаётган ислоҳотлар эртанги кунимиз янада фаровон бўлиши, аниқроғи биз ёшларни бахтли ҳаёт кечиришимизга қаратилган экан, бу йўлда биринчи навбатда ўзимиз боришимиз керак. Бу конференция давомида олдимизга қўйилган вазифалар мазмуни демакдир.

Конференцияда “Ёш адолатчилар” қаноти Кенгашининг 5 йиллик фаолияти бўйича ҳисоботи эшитилди ва амалга оширилган ишларга баҳо берилади. Бунда 7 минг 595 нафардан зиёд андижонлик “Ёш адолатчилар”нинг ҳам муносиб ҳиссаси борлиги бизни қувонтиради. Бугун вилоятда амалга оширилаётган ислоҳотларда  ҳам фаол қатнашаётганимиз бунинг тасдиғи.

 “Тенгдошга тенгдош” принципи асосида биринчи навбатда ўз тенгдошларимизни фаолликка чақириш доимий вазифамизга айланган. Жумладан, тадбиркорлик фаолиятини кенгайтириш орқали уларнинг  бандлигини таъминлашга алоҳида эътибор қаратяпмиз. Биргина Андижон шаҳрида бизнинг кўмагимиз билан жорий йилда 22 нафар йигит-қиз тадбиркорлик фаолиятини бошлагани, 134 нафарининг бандлиги таъминлангани бунга мисол. Бу ўз ўзидан ана шу ёшларни юрт равнақи ва ватан келажаги йўлида биз билан бир сафда қадам ташлашга чақиради.

Таълим муассаларида билим олаётган ва аниқ иш жойига эга бўлган тенгдошларимиздан ташқари вақтинча ишсизлар билан кўпроқ ишлаяпмиз. Чунки улар ҳам жамиятда ўз ўрнини топиши ва тўғри йўлдан адашмаслиги зарур. Бунинг учун давлатимизнинг бугунги сиёсатидан хабардор қилиш бош вазифадир.

Бир сўз билан айтганда, конференциядан сўнг андижонлик ёшлар бир мақсад йўлида янада катта куч бўлиб бирлашишга қарор қилдилар. Ўз фаоллигимиз билан бизга билдирилган ишончни оқлаймиз.

Бунёдбек ТЎХТАСИНОВ,

Ўзбекистон “Адолат” СДП Андижон шаҳар кенгаши фаоли,

 “Ёшлар парламенти” аъзоси