Биз тараққиёт кушандасига қаршимиз

16.02.2021 14:02:32

Бир неча кундирки, мамлакатимиз умумтаълим мактабларида Ўзбекистон Республикаси Президентининг Олий Мажлисга йўллаган Мурожаатномасида илгари сурилган ғоялар доирасида умумий ўрта таълим мактаблари ўқувчиларининг онгига коррупцияни жамият ривожланишига салбий таъсирини етказиш ҳамда уларнинг ҳуқуқий билимини ўстириш, уларда коррупцияга қарши нафрат ҳиссини шакллантириш мақсадида иншолар танлови тадбирлари ўтказилмоқда.

Дунёдаги барча мамлакатлар тараққиётига салбий таъсир этаётган муаммолардан бири шак-шубҳасиз коррупциядир. Эътиборли жиҳати шундаки, жиноятнинг бу тури учун дунё бўйлаб жазо муқаррарлиги таъминланмоқда. Коррупцияни ҳеч иккиланмай “тараққиёт кушандаси” деб аташ мумкин.

Коррупция – шахснинг ўз мансаб ёки хизмат мавқеидан шахсий манфаатларини, ёхуд ўзга шахсларнинг манфаатларини кўзлаб моддий ёки номоддий наф олиш мақсадида қонунга хилоф равишда фойдаланиши, худди шунингдек бундай нафни қонунга хилоф равишда тақдим этишидир.

Коррупцияга қарши кураш механизмини такомиллаштириш, унинг ҳуқуқий асосларини яратиш дунё миқёсида халқаро ташкилотларнинг диққат марказида бўлиб турибди. Давлатимиз раҳбари томонидан ўтган 2020 йил 29 декабрь куни Парламентга йўллаган Мурожаатномасида  коррупцияга қарши курашиш бўйича фаолиятни кучайтириш, коррупцияни илдизи билан йўқотиш барчамизнинг бурчимиз эканлиги таъкидланган эди.

Шундай экан, ўзимизга хулоса қилишимиз, келажакни коррупциясиз биргаликда қуришимиз, бунинг учун аввало ёшлар онгида коррупцияга қарши нафрат уйғотиш, коррупциянининг ҳар қандай кўринишини бартараф қилиш учун биргаликда курашишимиз зарурдир. Ёш авлод онгига коррупцияга қарши кураш тушунчасини сингдириш эса давлат ва жамият тараққиётига салбий таъсир этувчи мазкур иллатга қарши курашишнинг ҳуқуқий механизми сифатида хизмат қилади.

Айни пайтгача вилоят ҳудудларидаги “Биз коррупцияга қаршимиз” номли 3 босқичли, яъни туман (шаҳар) – вилоят - республика даражасида умуммиллий иншолар танлови шаҳар ва туманлар умумий ўрта таълим мактабларининг 6–11 синфлари  ўқувчилари ўртасида ўтказилмоқда. Танловининг биринчи босқичи туманлар даражасида ўтказилган иншолар танловига шу кунгача,  жами 5000 дан зиёд иншолар қабул қилинди.

Гулчеҳра Турдиева, Термиз тумани 16-сон ўрта умумтаълим мактаби директори, Халқ депутатлари Термиз туман Кенгаши депутати:

Коррупция ҳар қандай давлат ва жамиятнинг барча соҳалари ривожланишига жиддий путур етказади, тараққиётни секинлаштиради, давлатни ич-ичидан емириб боради, халқни хонавайрон этади, ҳуқуқ ва манфаатлар бузилишига сабаб бўлади. Бугунги кунда бутун жаҳон миқёсида ушбу жиноятга қарши курашиш энг долзарб масалалардан бирига айланган. Айни пайтда мамлакатимизда коррупцияга қарши курашишнинг барча ҳуқуқий асослари яратилган. Бу борада ҳар биримиздан ҳушёрлик ва масъулиятлилик талаб этилади. Давлатимизнинг фаровонлиги, халқимизнинг эртанги куни, келажагимиз йўлида бир мақсад сари бирлашсаккина бу иллатнинг илдизини қуритишга эриша оламиз. Барчамиз коррупциянинг ҳар қандай кўринишига қарши курашишни фарзандларимиз онгига сингдиришимиз, бунга қарши маънан ва ҳуқуқий тайёрланишимиз, ушбу иллатнинг жамиятимиз келажаги учун хавфлилик даражасини тушунтириб беришимиз зарур. Фуқароларимизнинг яъни ҳар бир шахснинг ўзи унинг жамиятдаги ўрни, хатти-ҳаракати қанчалик муҳим аҳамият касб этишини тушунганида ва ўзида масъулият ҳис этган ҳолдагина коррупцияга қарши курашишда самарали натижага эришса бўлади.

 Фахриддин ОРИФХОНОВ,

Ўзбекистон “Адолат” СДП Сурхондарё вилоят Кенгаши

мафкуравий ишлар бўйича раис ўринбосари

Улашинг!

Фикрингизни қолдиринг

Илтимос жавобингизни киритинг

+