Болалар келажагини сотиб олиш мумкинми?

Ёшлигимда дўстимнинг ота-онаси ажралишгани ҳақида эшитгандим.  Унинг бошқа тенгдошларимиз билан чиқишиб кетиши қийин бўларди. Кейинчалик унинг ўгай отаси бу “текинтомоқ” учун ўзинг отаси томонидан алимент пуллари берилаётган учун она-болани калтаклаётган экан.

Бугун бунга ўхшаш воқеаларни  кўп учратишимиз мумкин.  Ўтган йилнинг сўнги чорагида қуйи палата депутатлари туманимизга ташриф чоғида айнан ажрим масаласига эътиборини қаратди. Депутатларнинг аҳоли билан учрашувларнинг бирида мен ҳам қатнашадиган бўлиб қолдим. Анчагина одам тўпланди, учрашув қизғин руҳда муҳокамаларга бой тарзда бўлиб ўтди. Учрашув сўнгида бир бола депутатларнинг бирини этагидан тутиб “Илтимос, менинг аямни олиб келиб берингизлар...” , деди. Ҳамма ҳайрон бўлиб қолди. Маҳалла раисидан сўралганда уларнинг ота-онаси ажралишгани маълум бўлди. У-бу бўлди-ю, учрашув тугади, ҳамма тарқалди. Депутат опалар билан ҳокимлик биносида учрашиб қолдик, мен ўша воқеа ҳақида сўрадим улар ҳолатни ўрганишиб ота алимент тўлашдан қочиб болани ўз уйида олиб қолгани ҳақида гапиришди.

Таажжубланасан киши, яқинда МИБ туман бўлимида бир ота ўз қизи учун ўн беш миллион пул бераётганига гувоҳ бўлдим. Бугунги кунда тўланаётган арзимаган  алимент пулларни эртамиз эгалари бўлмиш фарзандларимизнинг бахтли бўлиши учун етарли бўлса, бу пуллар ота ёҳуд она меҳрини бера олса эди. Ачинарлиси, она пуллари олгандан сўнг ҳам фарзандининг тарбиясига эътиборли бўлиш ўрнига фарзандининг шуноғам “порлоқ келажаги”ни янада яхшилаш учун ишлашга чет элга кетишмоқда.

Энг ачинарлиси  ота меҳридан мосуво бу фарзандлар она эътиборидан ҳам маҳрум бўлишаётгани, бу мавзуга кенгроқ ёндашувни талаб этади. “Барча замонларда ҳам оила жамиятнинг асоси бўлиб қолаверади” деган эди француз адиби Оноре де Бальзак. Айнан шунинг учун ҳам бу мавзу ҳеч қачон эскирмайди. Шундай салбий ҳолатлар камайиши учун ёшлар ўртасида никоҳ шартномасининг мажбурий тартибда тузилишини, унинг никоҳ даврида ҳам, ажрим ҳолати юзага келганда ҳам реал амал қилиши механизми ишлашини йўлга қўйиш керак. Ана шунда ажрашиш масаласига ҳар икки тараф ҳам жиддий ёндашади, зиммасидаги масъулиятини ўйлаб ҳаракат қилади. Ана шундагина арзимас пуллар эвазига болалар келажаги, кўзларидаги қувончи сотилмайди.

Дилмурод МАҲРАМОВ,

Ўзбекистон “Адолат” СДП Жомбой туман кенгаши “Ёшлар қаноти” раиси