Демократик ривожланишлар сари муҳим қадам

Яқинда Ўзбекистон Республикаси Президентининг «Жамоатчилик палатасини ташкил этиш тўғрисида»ги фармони қабул қилинган эди. Фармонга кўра Президент ҳузурида Жамоатчилик палатаси ва ҳар бир ҳудудда унинг бўлимларини ташкил этиш белгилаб қўйилди.

Хўш, бу тузилма бизга нима беради? Оддий халқ учун қандай имкониятлар эшигини очади? Ушбу саволни ўртага қўяр эканмиз, бажараётган ҳар бир ишимизнинг самараси шу мамлакат эртаси учун хизмат қилиши зарурлигини чуқур англашимиз керак.

Фармонга кўра, фуқароларнинг давлат ва жамият ишларидаги иштирокини фаоллаштиришга ҳамда давлат-хусусий шерикликнинг замонавий механизмларини жорий этишга кўмаклашиш Жамоатчилик палатаси фаолиятининг асосий йўналишларидан бири бўлиши айтилди. Энди, ушбу йўналишлар доирасида келгусида амалга оширилиши лозим бўлган ишлар кўламининг сарҳисобини келтирадиган бўлсак, халқимиз, одамларимиз учун кўпгина қулайликларни яратиб бериши турган гап. Албатта, ҳар бир чиқарилаётган қонунлар энг аввало, жамоатчилик назоратидан ўтказилиши лозим. Бу ўз навбатида шаффофликни таъминлашга ҳизмат қилади. «Менинг фикрим» жамоатчилик порталининг ушбу палата тасарруфига ўтказилиши эса муҳим қонун ва қарорлар қабул қилинишида жамоатчиликни бевосита жалб этиш, янада кенгроқ қамраб олиш имконини бермоқда.

Мазкур Жамоатчилик палатасининг аъзолари 50 нафардан иборат бўлиши, шундан 18 нафари маҳаллий ННТ ва ОАВ вакилларидан иборат бўлиши сиёсий партиялар фаолиятида ҳам янги босқични бошлаб беришни назарда тутади. Яъни, сиёсий партиялар ҳам мазкур палата ишида бевосита иштирок этиши, давлат аҳамиятига молик бўлган муҳим қонунларнинг қабул қилинишидан тортиб, қай йўсинда ишлашигача назорат қилиб бориши мумкин. Бу эса сиёсий партиялар фаолиятини янада жадаллаштириб, ҳақиқий демократик босқичга олиб чиқади. 

Адил АМАНОВ,

Ўзбекистон «Адолат» СДП

Тошкент шаҳар Кенгаши

раис ўринбосари