Депутат аралашгач: фуқаро уй, паспорт, пенсияга эга бўлди

30.01.2020 20:01:51

 

Саховат – бу инсонлардаги энг олий фазилат ҳисобланади. Ўзбекистон «Адолат» СДП фаоллари ана шу қадриятни доимо амалга оширишга эътибор қаратиб келади. Хусусан, Халқ депутатлари Нукус шаҳар Кенгаши депутати Яхшибека Абдуллаева халқимизга хос меҳр-оқибат, хайр-саховат каби эзгу хислатлар мужассам бўлган эзгу ишни амалга оширди.

Турмуш ташвишлари инсон боласини ҳаёт денгизининг гоҳ у, гоҳ бу кирғоғига улоқтириб ташлайди. Кўпчилик инсонлар қийинчиликларни сабр-бардош билан енгиб сузишда давом этса, айримлар кирғоқда қолиб кетади. Ҳаёт шундай сиру-синоатларга тўладир. 70 ёшни қаршилаган Геннадий Мишенко ҳам ҳаётда қийинчиликка дучор бўлган инсонлардан бири.

Одамларнинг муаммоларини ўзиники деб қабул қилиб, унга ижобий ечим топишга интиладиган депутат Я.Абдуллаева ҳар хафтанинг чоршанба куни партия лойиҳаси доирасида аҳоли билан юзма-юз суҳбатлар уюштиради. Мана шундай мулоқотларнинг бирида ҳаёт синовлари қийнаб қўйган Геннадий Мишенконинг бошпанасиз, оч-наҳор ҳолда кун кечираётгани аниқланди. Депутат Я.Абдуллаева бунга дарҳол чора кўриш мақсадида Нукус шаҳар ҳокимлиги ва тегишли ташкилотлар ходимлари билан гаплашди.

Депутатнинг ташаббуси ва саъй-ҳаракатлари самара бериб, Геннадий Мишенко бошпанали бўлди. Яъни, унга Нукус шаҳридаги кам таъминланган оилалар учун мўлжалланган кўп қаватли уйдан хона ажратилди.  Шунингдек, унга фуқаролик паспортини олиш ва нафақа тайинланишига ҳам эришилди.

Ушбу кўрсатилган беғараз кўмаклар учун Геннадий Мишенко Ўзбекистон «Адолат» СДП ва депутат Я.Абдуллаевадан миннатдор.

Муҳтарам Президентимизнинг “Ўзбекистонда одамлар бир-бирига бегона эмас”деген сўзлари амалда яна бир ўз тасдиғини топди.

Айшолпан ОРАЗЫМБЕТОВА,

Ўзбекистон «Адолат» СДП

Қорақалпоғистон Республикаси Кенгаши

матбуот котиби

Улашинг!

Фикрингизни қолдиринг

Илтимос жавобингизни киритинг

+