Депутат кўмаги билан эски уй таъмирланди

Чимбой тумани «Жипек жолы» маҳалла фуқаролар йиғини, Ж.Мамутов кўчаси 5-уйда истиқомат қилувчи ижтимоий ҳимояга мухтож Махсет Ниетуллаев уй-жой ажратилиши ёки уйини таъмирлашда амалий ёрдам кўрсатишини сўраб, Ўзбекистон «Адолат» социал-демократик партиясининг Халқ депутатлари Чимбой тумани Кенгашидаги депутатлик гуруҳи аъзоси Азатжан Худайбергеновага мурожаат қилган эди.

Шундан сўнг, депутат маҳалла фаоллари билан маслаҳатлашган ҳолда, уларнинг яшаш шароити, турмуш тарзи ва даромад манбаларини ўрганиб чиқди. Ҳақиқатдан ҳам фуқаро яшаб турган 2 хонали уй таъмирталаб аҳволга келиб қолганлиги, ўзи эса болаликдан ногиронлиги ва кам таъминланганлар руйхатида турганлиги аниқланди. 

Депутат ўз маблағи ва маҳалладаги саховатпеша инсонлар кўмагида қисқа вақт ичида уйни тўлиқ таъмирлаб берди. Шунингдек, уйига қайта электр энергия симлари тортилиб, янги электр ҳисоблагич ўрнатиб берилди.

Хонадонга кундалик турмуш тарзи учун зарур бўлган уй-рўзғор жиҳозлари ҳам берилди. Рамазон ҳайити куни эса уй эгалари янги таъмирланган уйига киради.

— Болаликдан биринчи гуруҳ ногирониман, турмуш ўртоғим ҳам ногирон, 1 нафар фарзандимиз бор. Мана неча йилдирки, эски 2 хонали уйда яшаб келаётган эдик, уй-жой олишга маблағимиз, қуришга ва таъмирлашга умуман имкониятимиз йўқ эди. Депутатга мурожаатим тез ва тўлиқ қаноатлантирилганидан хурсандман, саховатпеша одамлардан эса жуда ҳам миннатдорман - деди Махсет Ниетуллаев.

Ханназат СУЛАЙМАНОВ,

Ўзбекистон «Адолат» СДП

Чимбой тумани Кенгаши раиси