Депутат мактабларда: Тиббий ҳимоя қай даражада?

Олий Мажлис Қонунчилик палатаси депутати Муҳаммаджон Валиев Фарғона шаҳридаги умумтаълим мактабларида бўлди. Депутат таълим даргоҳларида ўқитувчилар ва ўқувчиларнинг кайфияти, мураккаб пандемия даврига бўлган муносабати, муаммолари, таклифлари билан яқиндан танишгач, бу ерда тиббий ҳимоя масалаларига қаратилаётган эътибор, шарт-шароитлар билан қизиқди.

Фарангиз Абидова, Фарғона шаҳар 42-сонли умумтаълим мактаби ўқитувчиси:

- Ҳозирги кунда мактабимизда яратилган санитарик-эпидемиологик шароит она-оналарни қониқтирмоқда. Бошида бу жараёнга мослашиш қийинроқ бўлди, лекин жамоамиз билан якдилликда қилган ҳаракатларимиз бесамар кетмади. Ўқув жараёни бошланишидан олдин она-оналар хоҳиш-иродаси биринчи ўринда ўрганиб чиқилди. Дарслар 2 сменада ташкил қилинган бўлиб, синфлар ҳам алоҳида гуруҳларга ажратилди. Онлайн ўқиш истагини билдирган ўқувчилар билан ҳам мунтазам равишда ҳар бир фан ўқитувчилари шуғулланиб бормоқдалар.

Депутат мактаб ошхонаси, спорт заллари, синф хоналарида бўлиб, педагогларга COVID-19 пандемияси даврида умумий ўрта таълим мактаблари ва ўрта махсус мактаб интернатларининг фаолиятини ташкиллаштириш бўйича вақтинчалик санитария-эпидемиологик талабларини батафсил тушунтириб ўтди.

Муҳаммаджон Валиев, Олий Мажлис Қонунчилик палатаси депутати:

 -Дарҳақиқат,  мактабларда тиббий ҳимояланиш масаласига масъулият билан ёндошилган. Мактаб ҳудудига яқинлашар экансиз, у ерда дезинфекция қилинаётган йўлакларни, оралиқ масофа сақлаш қоидалари ўрнатилганини, ҳар бир ўқувчининг ҳароратини ўлчаётган тиббиёт ходимларини учратасиз. Ҳар бир синф хоналарида эса қўл ювиш учун шароитлар, антисептик воситалар, касалликдан ҳимояланиш бўйича ўрнатилган тарғибот воситалари мавжуд. Биз депутатларнинг галдаги вазифаси эса мазкур ҳолатнинг давомийлигини таъминлаш ва вилоятнинг энг чекка ҳудудларидаги мактабларда ҳам тиббий ҳимояланишни мустаҳкамлашда кўмаклашишдан иборат.

Фарғона шаҳридаги бир нечта мактабларни ўрганган депутат вилоятнинг чекка туманларига йўл олди.

А.Норматов,

Ўзбекистон “Адолат” СДП

Фарғона вилояти Кенгаши

туманлараро ижрочи котиби