Депутат номини оқлайлик

Давлатимиз раҳбарининг 20 январь куни Олий Мажлис Қонунчилик палатасидаги маърузасида ҳар бир депутат, хоҳ у парламент депутати бӯлсин, хоҳ вилоят, шаҳар, туман депутати, келгуси беш йиллик фаолиятидаги асосий мезонлар белгилаб берилди.

Агарда депутат халқ дарди билан ёниб яшамаса, худуддаги муаммолар ечими ҳақида қайғурмаса, у нафақат ўз сайловчилар олдида ишончини йўқотади, балки халқнинг депутатларга бӯлган ишончининг йўқолишига сабабчи бўлади.

Биз депутатликка номзодларнинг жойларда сайловчилар билан бўлиб ўтган учрашувларда, оммавий ахборот воситаларида билдирилган, ижтимоий аҳамиятга эга фикр-мулоҳазалар, таклиф ва тавсиялар, кўтарилган савол ва муаммолар – буларнинг барчаси албатта эътиборга лойиқ. Ҳар биримиз депутатликка сайлангунча халққа катта ваъдалар бердик. Энди уларни бажариш вақти келди. Вақт кутиб турмайди. Бир кун ё бир ҳафта ҳудудда кўринмай қолсак, сайловчиларимиз: "Ана сайлов ўтди, энди бу депутат ҳам йўқолиб қолди", дейишлари аниқ. Биз эса бундай эътирозга ўрин қолдирмаслигимиз лозим. Президентимиз нутқида айтган "Ҳар бир депутат беш йил давомида ўз сўзининг устидан тўлиқ чиқиши, партиясининг обрўсини сақлаши учун бугундан бошлаб жиддий ҳаракат бошлаши керак. Сизлар алоҳида “Йўл харитаси”ни тузиб, сайлов вақтида билдирган барча-барча ташаббусларингизни яхлит тизимга солиб, ишни пухта ташкил этсангиз, ўйлайманки, бу халқимизга ва сайловчиларингизга жуда маъқул бўлади", деган сўзлари депутатларнинг ёдидан чиқмаслиги лозим.

Шунингдек, биз депутатлар иш фаолиятимизда депутатлик сўровидан кенг фойдалана олсак, муаммолар ечими осонлашади. Сабаби бугунги кунда парламент ва депутат сўровини кўриб чиқмаганлик ёки кўриб чиқиш муддатини бузганлик учун жавобгарлик чоралари кучайтирилган. Агарда ҳар бир депутат халқнинг, ўз сайловчиларининг ҳурмати ва ишончини қозонишни хоҳласа, у бугунданоқ белни маҳкам боғлаб, ишга киришмоғи керак.

Дониёр ЮСУПОВ,

Халқ депутатлари Қибрай туман

 Кенгаши депутати