Энди аввалгидек яшаб бўлмайди

24.01.2020 17:01:45

Президентимиз Шавкат Мирзиёевнинг Олий Мажлисга мурожаатномасини тинглар эканман, эртанги кунимизга бўлган ишончим янада ортди. Айни дамда партия фаоли сифатида зиммамга катта масъулият юклатилганлигини ҳис этдим.

Айтиш мумкинки, у фаровон ҳаётимиз, юрт равнақига хизмат қилувчи дастуриламал ҳужжат бўлади. Кўтарилган ҳар бир масала  Ўзбекистоннинг тараққиёти ва эртанги куни билан боғлиқ.

Мурожаатномада шу йилнинг, шунингдек, келгуси даврнинг устувор вазифалари белгилаб берилди. Бинобарин. хотин-қизларга алоҳида эътибор қаратилгани биз андижонлик “адолатчи” аёлларни чексиз қувонтирди. Олийгоҳларга қабул қилишда қизлар учун алоҳида гарант ажратиш таклифи нафақат ёшларни, биз оналарни ҳам хурсанд қилди. Негаки олий маълумотли аёлнинг оилада ҳам, фарзанд тарбиясида ҳам ўрни катта. Қолаверса, у жамиятнинг фаол аъзосига  айланади.

Аслида кейинги йилларда бу борада кўп ишлар қилинмоқда. Узоққа бормайлик, Олий Мажлис палаталари ва маҳаллий кенгашларга ўтказилган сайловларда хотин-қизларга кенг ўрин берилгани ҳам фикримиз тасдиғидир. Бугун депутатлик  мақомини олган опа-сингилларимиз юрт равнақи ва тараққиётига ҳисса қўшишда янада фаоллик кўрсатишлари шубҳасиз.

Аҳолининг иш билан бандлигини таъминлаш, касбга йўналтириш ва  ўқитиш масаласида билдирилган фикрлар ҳам эътиборли. Давлатимиз раҳбари такрор-такрор айтганларидек, энди аввалгидек яшаб бўлмайди.   Давр ҳар биримиздан янгича яшашни, фаолликни, амалга оширилаётган ислоҳотларда фаол иштирок этишни талаб қилмоқда.

Шу ўринда яна бир масала. Партиямизнинг сайловолди дастурида коррупцияга қарши курашиш олдимизга долзарб вазифалардан бири сифатида қўйилган. Мурожаатномада ҳам бу вазифа жамиятни ривожлантириш ва соғлом муҳитни яратишнинг асоси сифатида тилга олинди. Демак, коррупцияни илдизи билан қуритишга бор куч ва имкониятлармизни сарфлашимиз керак.

Олий Мажлис айнан биз фуқаролар томонидан билдирилган таклифлар ва қонун ижодкорлиги йўлидаги фикр-мулоҳазаларимизни таҳлил этади. Бугун бизга қандай қонунлар кераклиги хусусида хулоса қилади. Бунинг қанчалик самарали кечиши сиз-у бизнинг фаоллигимизга боғлиқ.

                                               Малохатхон МУСАЕВА,

                   Ўзбекистон “Адолат” СДП Андижон

                      вилояти кенгаши раиси ўринбосари

Улашинг!

Фикрингизни қолдиринг

Илтимос жавобингизни киритинг

+