Эътирозлар соясида эътирофлар сезилиб қолди

Энг аввало, Ўзбекистон “Адолат” СДП Тошкент вилояти Кенгаши “Миллий тикланиш”нинг Тошкент вилояти Кенгашига бизнинг партиямиз фаолиятига бефарқ бўлмагани учун ўз миннатдорчилигини билдиради.

Шу билан биргаликда, Сизнинг мақолангизда келтирилган бирқанча фактларга (агар буни шундай аташ мумкин бўлса) биз ҳам ўз навбатида эътирозларимизни билдирмоқчимиз. Йўқ, нотўғри ўйламанг, биз Тошкент вилоятида МТДПнинг олиб бораётган фаолиятидан кир қидирмоқчи эмасмиз, аксинча “Адолат”нинг нуқтаи назари бўйича Сизга ва Сиз қатори фикрлаётганларга маълумот бермоқчимиз. Хуллас, қуйидаги фикрларимиз Сизнинг эътиборингизни тортади, деган умиддамиз:

Биринчидан, ижтимоий тармоқдаги постда шундай дейилади: “Бугун кўришимиз мумкинки, юртимизда сайловлар жараёнида сиёсий партияларнинг “Миллий тикланиш” демократик партиясидан ташқари фаоллиги ортиб кетди.”  Бу билан МТДП ўзининг ҳали фаоллашмаганлигини, сайловлар олдида партиялар ҳар доимгиданда кўпроқ масъулият ва жавобгарлик билан ишлаши кераклигини, бошқа партиялар фаоллашган-у, МТДП ҳали бунга етиб бормаганлигини билдириб қўйдингиз.

Иккинчидан, “Айниқса бу борада “Адолат” социал-демократик партиясининг фаолиятини кузатсак...” деган сўзларингиз билан “Адолат” партиясининг бошқа сиёсий партияларга нисбатан анча олдинда кетаётгани, тарғибот воситаларию, тадбирлари, халқ орасига кириб боришлари билан бошқалардан кўра анча илгарилаб кетаётганлигини тан олганингиз учун сизга ташаккурларимиз чексиз.

Учинчидан, Ўзбекистон “Адолат” СДП бугунги кунда ўз имиджи, пиар, тарғибот ва ташвиқотнинг ўзига хос янги инновацион усуллари ва энг асосийси ўзиниинг фаол ва жонкуяр электоратига эга. Буни ҳам “Ана сизга сиёсий партиянинг пиар имижи…” сўзлари билан нафақат адолатчиларга, балки, МТДП аъзоларига ҳам эслатиб қўйганингиз учун Сизга яна бир бор раҳмат!  

Тўртинчидан, айнан Тошкент вилояти Бўка туманига эътибор қаратгансиз. Тўғри, бугунги кунгача Ўзбекистон “Адолат” СДП Бўка тумани Кенгашида ходимлар қўнимсизлиги кузатилди. Лекин, бунга ижобий тарафдан қарашингизни маслаҳат берган бўлар эдик. Чунки, Бўка туманида партия Кенгаши раиси бўлган ходим ўзини партия ишида кўрсатиши билан у нуфузли Республика ташкилотларига ишга таклиф этилганлиги ва биз уларни ўз аъзоларимиз сафида сақлаб қолиб, улар учун масъулиятли лавозимларга трамплин вазифасини ўтаб берганимиздан жуда ҳам хурсандмиз. Ишонаверинг, нафақат Бўка, балки бошқа туман ва шаҳарларимиз раислари ҳам нуфузли лавозимларга ўтиб кетган. Лекин, бугунги кунда Тошкент вилоятидаги барча партия туман ва шаҳар Кенгашларида раисларимиз штат асосида фаолият олиб бормоқда.

Бешинчидан, Бўка туманида маҳаллий Кенгаш депутатларимиз йўқлиги, биргина Халқ депутатлари Тошкент вилояти Кенгаши депутати Исломов Зиёвуддин Игнатовичнинг фаолияти қониқарли эмаслиги, у томонидан тегишли ташкилотларга бир дона ҳам депутатлик сўрови юборилмганлиги тўғрисида ёзибсиз. Исломов Зиёвуддин Игнатович 2017 йилда бўшаб қолган депутатлик ўринларига ўтказилган сайловларда ўз рақибларига нисбатан кўпроқ овоз тўплаган ҳолда, (шу жумладан МТДП томонидан кўрсатилган номзоддан ҳам) депутат бўлиб сайланган. Ўзбекистон “Адолат” СДП депутатлик гуруҳи аъзолари томонидан олиб борилган депутатлик фаолияти ҳисоботи МТДПга ҳам берилиши керак эканлигини билмаган эканмиз. Исломов Зиёвуддин  томонидан икки йиллик депутатлик фаолияти давомида тегишли ташкилотларга бир нечта депутатлик сўровлари юборилган, шунингдек, у томонидан нафақат Бўка тумани аҳолиси учун, балки бутун Тошкент вилояти аҳолиси учун ҳам бирқанча амалий ишлар амалга оширилган. Ўзбекистон “Адолат” СДП Тошкент вилояти Кенгашига ташриф буюрсангиз, ҳаммасига ўзингиз гувоҳ бўлишингиз мумкин.

Олтинчидан, мақолада “Бугун сайловлар жараёнида “Адолат” СДП ўз партияси рамзини Бўка туманидаги тўғри келган жойларга, корхона-ташкилот, хонадон, хусусий дўконлар, бузиладиган ёки эскирган деворларга ва симёғочлар ва дарахтларга ҳам ўрнатиб кетиши мазкур сиёсий партия томонидан унинг сиёсий саҳнадаги обрўсига путур етказиши табиий эмасми?” дейилган.

Албатта, танқидий фикрларингиз учун ташаккур. Ахир, “Танқид келажак меваси” деб бекорга айтишмайдику. “Қизил атиргулимиз” Сизни бефарқ қолдирмаган экан, демак, партия ўз мақсадига эришиш йўлида. Нафақат, адолатчилар, балки МТДП вакиллари ҳам бизнинг тарғибот воситаларимизга эътибор қаратаётганлигидан хурсандмиз. Демак, “Адолат” рамзи аҳолининг кўнглидан жой олмоқда. Ахир, “Адолат” куттирмайди.

Хулоса ўрнида шуни айтиш мумкинки, “Миллий тикланиш” партияси “Адолат”ни ғийбат қилиш эвазига сайловларда МТДПдан  депутатликка қўйилган номзодларга овоз беришини сўрар экан, демак, бу ҳам “Адолат”нинг обрўсидан фойдаланишнинг бир усули эканда... Қизиқ...

“Адолат” СДП Тошкент вилояти Кенгаши матбуот хизмати