Фаолиятимиз жиддий курашга асосланса, муваффақиятга эришамиз

Давлатимиз раҳбарининг Олий Мажлис Қонунчилик палатаси биринчи йиғилишидаги нутқи орқали Олий Мажлис Қонунчилик палатаси депутатлари зиммасидаги улкан ва масъулиятли вазифаларини таъкидлаб ўтгани барча депутатликка сайланганларнинг фаолияти учун дастуриламал бўлди, десам янглишмайман.

Мамлакатимизда иқтисодий, ижтимоий, сиёсий ислоҳотлар амалга ошириш, уларни янада жадаллаштиришга доир долзарб вазифаларни белгилаб берган, битта мақсад йўлида барча кучларни бирлаштириб, уни халқимиз турмуш фаровонлигини яхшилашга сафарбар қилишга ундовчи нутқи сиёсий куч фаолларининг зиммасидаги масъулият ҳиссини яна бир карра оширди.

Давлатимиз раҳбари ҳар бир депутат беш йил давомида ўз сўзининг устидан тўлиқ чиқиши, партиясининг обрўсини сақлаши учун бугундан бошлаб жиддий ҳаракат бошлаши лозимлигини, алоҳида “Йўл харитаси”ни тузиб, сайлов вақтида билдирган барча-барча ташаббусларингизни яхлит тизимга солиб, ишни пухта ташкил этиш зарурлигини таъкидлаб ўтдилар.

Ҳар бир депутат бугун халқ ишончига сазовор бўлганлиги учун ҳам халқ томонидан сайланганини ва бунинг асосий сабабчиси партия эканлигини, уни халқ олдига олиб чиқан партия эканлигини унитмаслиги лозим. Бугунги депутатларимизнинг шу беш йиллик фаолияти келаси беш йилликда бизни ютуғимизга асосий сабабчи булишларини унитмасдан, халқ хизматига маҳкам бел боғлашлари керак. Мавжуд муаммолар юзасидан асослантирилган таклиф билан халқ депутатлари Маҳаллий Кенгашлари кун тартибини шакллантиришда иштирок этишимиз жоиз.

Депутатларимиз олдида ҳам аҳолининг турли ижтимоий гуруҳлари ва қатламларининг турмуш сифати ва даражасини оширишга қаратилган ҳаётий таклифларни илгари суриш, бу борада қабул қилинган қонунлар, қарорлар, давлат дастурлари ижросининг ҳудудларда бажарилиши устидан назорат қилиш имкониятларидан фойдаланишдек вазифалар турибди.

Юртимиз раҳбари сўзлари билан айтганимизда, “Депутатнинг қалби, виждони уйғоқ бўлса, вазирлар ҳам, ҳукумат ҳам, парламент ҳам уйғоқ бўлади, бутун жамиятимиз уйғоқ бўлади.” Партиядан сайланган депутатларимиз билан ҳамкорликда мамлакатимизда амалга оширилаётган ислоҳотларни қўллаб-қувватлаган ҳолда, қонунлар ижроси юзасидан депутатлик ва жамоат назоратини ташкиллаштиришимиз, халқнинг ишончини оқлашимиз, халққа берган ваъдаларимизнинг устидан чиқишимиз, ҳар бир қабул қилинадиган қарорда, ҳар бир ишда адолат бўлиши учун курашишимиз, вилоятимизнинг ижтимоий-иқтисодий муаммоларини ўрганиш ва уларни ҳал этиш бўйича аниқ чора-тадбир ва таклифлар  билан чиқишимиз даркор. Бунга эса меҳнат ва яна меҳнат орқали эришилади. Зеро, енг шимариб, астойдил ишлайдиган вақт аллақачон келган. Ўзгаришлар замони биздан шуни талаб қилмоқда.

Муҳиба БАБАБЕКОВА,

Ўзбекистон “Адолат” СДП Самарқанд вилоят Кенгаши раиси