Халқ ишончи – улуғ унвон

25.01.2020 16:01:23

Халқимиз ўз иродасини, хоҳиш-истагини ифода этиб, ўзлари танлаган депутатларни сайлаб олганига ҳам бир ойдан ошиқ вақт ўтди. Бугун эса мен сайлаган депутат қандай иш бошлади, қандай фаолиятни амалга оширади деб кутмоқда.

Муҳтарам Президентимиз Шавкат Мирзиёев Олий Мажлис Қонунчилик палатасининг илк мажлисидаги нутқида бу ҳақда алоҳида таъкидладилар. Дарҳақиқат, бугунги кун жим ўтирадиган, юқоридан буйруқ бўлишини кутадиган замон эмас. Депутатлик инсондан энг аввало, уйғоқ виждон, ақл-идрок ва тинимсиз меҳнатни талаб этадиган жараён. Шу билан бирга, бугунги кун депутатига осон бўлмайди. У доимо сайловчиси назарида, эътиборида бўлади. Чунки бу йилги сайловлар аҳолимизнинг сиёсий фаоллигини кучайтирди. Биз халқимизнинг ишончи билан бирга талабчанлик руҳини ҳам қабул қилиб олдик.

Президентимизнинг депутатларни ўз сайловчилари билан боғлаш имконини берадиган электрон портал ва мобил иловаларни ишга тушириш лозим, деган фикрлари шахсан менга маъқул келди. Чунки бугунги фан-техника ривожланган тезкор замонда ҳар бир инсон депутати нима иш қилгани, фаолияти билан танишиб бориши зарур. Яъни сайловчи билан депутат ўртасида доимий кўприк мавжуд бўлиб, ўзаро фикр-мулоҳазаларни алмашиб туриш фойдадан ҳоли бўлмайди. Токи ана шу тизим орқали сайловчи депутатнинг кундалик ишини кузатиб бориш, қонун лойиҳаларини муҳокама қилиш ва улар бўйича ўз фикрини билдириш имконига эга бўлсин. Шу билан бирга депутати фаолиятига баҳо ҳам бериб боради.

Кўпинча туман, вилоят депутатларининг фаолияти кўзга ташланмайди. Улар кўп ҳолларда маиший муаммоларга ўралашиб қолишади. Аммо инсон борки, уларнинг муаммолари ана шу майда икир-чикирлардан бошланади. Муаммонинг каттаси ҳам кичиги ҳам муаммо. Демак бунда асосий нарса депутатнинг жонкуярлиги, билими ва ташкилотчилиги катта аҳамият касб этади. Депутатлар аҳоли билан доимий мулоқот ўрнатиш орқали фуқаролар манфаатларини рўёбга чиқариши, ҳудудни ривожлантиришда муносиб ҳисса қўшиши зарур. Халқ билан мулоқот жараёнида билдирилган таклиф ва муаммоларни тизимли ўрганиб, уларнинг ечими юзасидан мутасадди ташкилотларга депутатлик сўровлари чиқариш, шунингдек, сессияларга масала киритишда фаоллик кўрсатиш энг муҳим масала.

Давлатимиз раҳбари таъкидлаганларидек, халқ ишончини қозониш осон иш эмас. Унинг ишончи эса энг улуғ унвон!

Гулнора АҲМЕДОВА,

Халқ депутатлари Тошкент вилоят кенгаши депутати

Улашинг!

Фикрингизни қолдиринг

Илтимос жавобингизни киритинг

+