Ҳар бир шахс масъулиятни ҳис қиладиган замондамиз

Бугунги халқимиз бошига тушган синовли дамни кеча хаёлга келтирмаган эдик. Кўча-куйда ўзларини эмин-эркин хис этиб юрган инсонлар бугун шароит тақозоси билан уй ичида паналашга мажбур. Албатта, бундан ҳар бир киши ўзига хулоса чиқариши зарур. Ҳар бир босган қадамини сарҳисоб қилиб, ортга назар ташлаши лозим. Бутун башариятни  қуршаб олган бу бало ҳеч кимни, шу жумладан халқимизни ҳам четлаб ўтаётгани йўқ. Турфа синовлардан шу вақтгача омон-эсонликда, баҳамжиҳат ўтиб келган ҳалқимиз бундан сўнгра ҳам табиатнинг ушбу балосидан бехатар ўтиб олишига ишончим комил. Бунинг учун биз ўзимиздаги масъулиятни икки карра орттиришимиз керак. Нафақат ўзимиз, балки оиламиз, фарзандларимиз, ён-атрофимиздагиларга ҳам намуна бўлишимиз зарур.

Аммо бу ҳолатни ҳали яхши англаб етмаётган, оқибатлари ҳақида чуқур ўй сурмайдиган юртдошларимиз ҳам талайгина. Кўча-куйга худа-беҳуда иши бўлмаса ҳам чиқиб, тўпланишиб турган инсонлар, автомашинасини ҳеч қандай руҳсатномасиз бошқараётганлар ёки шунча таъқиқларга қарамасдан тўй-томоша ўтказаётганларнинг қонун ва қарорларни четлаб ўтиши Ватанга хоинлик билан тенг аслида. Ҳар бир инсон фақат ўзининг эмас, ён-атрофидагиларнинг ҳам ҳаётига бевосита алоқадордир.

Таҳлиллар шуни кўрсатмоқдаки, битта вирус юқтирган киши ўзидан бошқа яна 400дан ортиқ одамга тарқатиши мумкин экан. Миллионлаб мамлакат фуқаролари истиқомат қиладиган юртимизда бу кўрсаткични бир ҳисоблаб кўринг. Тасаввур этишнинг ўзи аянчли. Бунинг олдини олиш учун чора-тадбирларни тинимсиз кучайтиртираётган давлат ва ҳукуматимиз меҳнатларини қадрлашни ҳам билайлик. Қатъий тартиб ва интизомга риоя қилайлик. Акс ҳолда кўзланган маррага етиб боролмаймиз. Ҳар бир фуқаро уйда қолиб, белгиланган тартиб-меъёрларга амал қилсагина ўзимиз, оиламиз, Ватанимизни асраб қолган бўламиз.

Луиза ХИКМАТОВА,

Халқ депутатлари Тошкент шаҳар Кенгаши депутати