Ишсизлар ўз хонадонида ишли бўлди

Оилавий тадбиркорлик аҳоли бандлигини таъминлашда энг катта захиралардан бири. Шу сабаб кейинги йилларда давлатимиз томонидан фаолиятнинг бу турига алоҳида эътибор қаратилмоқда. Ўзбекистон “Адолат” СДП Асака туман кенгаши фаоллари маҳаллаларда бу борада амалга оширилаётган ишларни ўрганди.

Тумандаги “Юқори бўз” МФЙдаги 860 та хонадонда  4556 нафар аҳоли яшайди. Карантин даврида фуқароларни иқтисодий ҳимоялашнинг бирдан бир йўли сифатида бандлик масаласи танланди.  23 нафар фуқаро вақтинча ишсиз сифатида қайд этилди. Яна 49 та оила ижтимоий кўмакка муҳтожлиги сабаб “Темир дафтар”га киритилди.

Манзурахон ЖЎРАЕВА, МФЙ раисининг ўринбосари:

-Ишсиз фуқароларнинг бандлигини таъминлашда оилавий тадбиркорлик қўл келди. Ташаббускорларнинг лойиҳаларини ўрганиб, маҳаллий Кенгаш депутатлари билан биргаликда молиявий кўмак бериш чораларини кўрдик. Натижада фуқароларимиз ўзларининг яшаш  хонадонида ишли бўляпти.

Фазлиддин Мамадалиев ўн йилдан буён Россияда ишларди. Фарзандлари улғайиб бораётгани, ота меҳри зарурлигини ўйлаб олис юртларга боришни тўхтатиб. тадбиркор бўлишга қарор қилди.

У ўз хонадонида кичик инкубатория ташкил қилиб, жўжа очиришни йўлга қўйди. Ўн беш кунда харидори тайин. Яна иссиқхона ҳам ташкил қилди. Ўзи билан бирга турмуш ўртоғи ва қизи ҳам ишли. Асосийси, даромад оила иқтисодини бойита бошлади. Уч ойда соф фойда ўн миллион сўмга етди.

Яна бир тадбиркор Жамолиддин Абдужабборов тикувчиликни танлади. Ўтган ойда ўн нафар маҳалла чеварларини ёнига олиб, тайёр трикотаж буюмлари ишлаб чиқаришни бошлади. Дастлабки харидорлар ишончи ва қилинган даромад уни янада изланишга ундамоқда.

МФЙда карантин даврида юқоридаги каби 18 нафар тадбиркорлар ўз фаолиятини бошлади. Бу хусусий секторнинг аҳоли бандлигини таъминлашда тутган ўрнини ўзида ифодаламоқда.

Камбағалликни қисқартириш ҳам ўз қўлимизда. Ижтимоий кўмакдан ташқари 23 та оилага такрорий экин экиш учун ер берилгани ва 11 нафар фуқаронинг жамоатчилик ишига жалб этилгани бундай оилалар сонини камайтирди. “Адолатчилар”нинг бу борадаги кўмагидан аҳоли хурсанд.

                            Меҳринисо КАРИМОВА,

Ўзбекистон “Адолат” СДП Асака туман Кенгаши раиси