ИЖТИМОИЙ ТАРМОҚЛАРДА ҚИЗҒИН МУҲОКАМАЛАРГА САБАБ БЎЛАЁТГАН МУАММО ДЕПУТАТИМИЗ НАЗОРАТИГА ОЛИНДИ

     Бундан чамаси ўн йилча олдин Навоий шаҳрида биринчи маротаба “Ҳайвонот боғи” очилишидан бутун навоийликлар беҳад хурсанд бўлган эдилар. Боғда бир нечта ноёб ҳайвонларни кўриб айниқса болажонларнинг табиатга, ҳайвонот оламига ошно бўлишида муҳим омил бўлиб хизмат қилиши кутилган эди.

   Бироқ, бу ерга ташриф буюрувчилар аксарият ҳолларда боғда сақланаётган ҳайвонларга яратилган шароитлар билан танишиб, завқланиш ўрнига ҳар қандай инсонда ҳайвонларга нисбтан ачиниш ҳисси жўш урарди.   

      Мазкур ҳолат бир неча бор ижтимоий тармоқларда қизғин жамоатчилик  муҳокамасига ҳам сабаб бўлган эди. Шундан сўнг Навоий шаҳри марказида жойлашган “Ҳайвонот боғи” (“Ferz Umid” МЧЖ)  тегишли ваколатли идоралар томонидан ўрганилди. Ушбу ҳайвонот боғида икки маротаба ўрганиш ишлари ва бир маротаба текшириш ишлари олиб борилган. Жумладан, биринчи ўрганиш жорий йилнинг 22 ноябрда ижтимоий тармоқларда тарқалган “Навоий шаҳар ҳайвонот боғидаги жониворларнинг қафаслари абгор ҳолатда эканлиги тўғрисида”ги мурожаат Навоий вилояти Экология бошқармасининг давлат инспекторлари, вилоят Ветеринария ва чорвачиликни ривожлантириш бошқармаси ходимлари, “GLOBAL MASTER GROUP” МЧЖ раҳбари (зоолог мутахассиси) ҳамда мурожаат қилган фуқаро ҳамкорлигида “Ҳайвонот боғи”да сақланаётган жониворларнинг сақланиш ҳамда соғлиги ўрганилган. Ўрганиш давомида  қуш ва хайвонларнинг сақланиш шароитларида камчиликлар борлиги, яъни ҳайвонлар сақланадиган қафасларнинг кичиклиги, ҳайвонларнинг остига сомон ёки бошқа юмшоқ тўшамалар ташланмаганлиги аниқланиб, ушбу камчиликларни зудлик билан бартараф этиш тўғрисида кўрсатмалар берилган. Ўрганишлар давомида мутахассислар томонидан ҳайвонот боғи раҳбарига кўрсатиб ўтилган камчиликлар белгиланган муддатда бартараф этилиши огоҳлантирилган.

     Иккинчи ўрганиш эса жорий йилнинг 3 декабр куни Навоий шаҳридаги “Ҳайвонот боғи” (“Ferz Umid” МЧЖ) Навоий вилояти Экология бошқармаси давлат инспекторлари ҳамда 38-Навоий сайлов округидан сайланган Ўзбекистон Республикаси Олий Мажлис Қонунчилик палатаси депутати Инна Коржикова ҳамкорлигида ўрганилди. Ўрганиш давомида жорий йил 22 ноябрда берилган кўрсатмалар қисман бажарилганлиги аниқланди.

    Учинчи ўрганиш; жорий йилнинг 12 декабр куни ижтимоий тармоқларда рус тилида тарқалган “«Мы не эстетики просили, а чтобы животным создали нормальные условия» - на зоопарк в Навои подали 70 жалоб” (“Биз эстетикани сўрамадик, ҳайвонларга яхши шароит яратиб беришни сўраймиз”-Навоийдаги ҳайвонот боғига нисбатан 70 маротаба шикоят қилинган) мурожаат Навоий вилояти Экология бошқармаси давлат инспекторлари, вилоят ветеринария ва чорвачиликни ривожлантириш бошқармаси ходимлари ҳамда шаҳар санитария эпидемиология маркази ходимлари ҳамкорлигида жорий йилнинг 16 декабр куни ўрганилди. Навоий шаҳрида жойлашган “Ҳайвонот боғи” (“Ferz Umid”МЧЖ)да Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш келишувига мувофиқ текшириш ишлари олиб борилди.

    Навоий шаҳрида жойлашган “Ҳайвонот боғи” (“Ferz Umid”МЧЖ) ишчи ходимлар сони ҳозирги кунда 3 кишини ташкил этади. “Ҳайвонот боғи”  ҳудудида ҳайвонлар ва қушларнинг  хонакилаштирилганлари яъни қуён, япон товуқ, кабутар 2 дона, товус 2 дона, сесарка ҳамда  ёввойи ҳайвонлар турлари яъни бир бош африка шери сақланиб келинмоқда.

   Бундан ташқари бир нечта ёввойи ҳайвонлар ҳеч қанақа рухсатномаларсиз ёки олди сотди шартномаларсиз сақланиб келаётганлиги аниқланди. Жумладан,  бир бош бўри, бир бош носуха, бир бош жайра, бир бош қирғовул, икки бош қора тасқара, бир бош бургут, бир бош укки, бир бош Кал журчи (стервяткик), бир бош қамиш мушуклар сақланиб келинган.

    Ушбу ҳайвонларнинг бургут, кал журчи (стервяткик), қора тасқара турлар Ўзбекистон Республикаси “Қизил китоби”га киритилган. Шунингдек, “Ҳайвонот боғи”да  бир бош айиқ сақланганлиги ушбу бир бош айиқ ёши ўтиб ўлганлиги аниқланди.

    Бу ҳаракатлар билан “Ҳайвонот боғи” (“Ferz Umid” МЧЖ)  Ўзбекистон Республикаси “Ҳайвонот дунёсини муҳофаза қилиш ва ундан фойдаланиш тўғрисида”ги Қонунни 39-моддаси талабларини бузган ҳамда Ўзбекистон Республикаси Вазирлар Маҳкамасининг 2014 йил 20 октябрдаги 290-сон Ҳайвонот дунёси объектларидан фойдаланиш ва ҳайвонот дунёси объектларидан фойдаланиш соҳасида рухсат бериш тартиб-таомилларидан ўтиш тартиби тўғрисидаги қарорнинг 3- боб бандларини бузган.

    Ушбу ҳайвонларнинг сақланиш ҳолатлари ўрганилганда бўри 5х4  метр квадрат, африка шери 5х4 метр квадрат, маккака маймуни 2х2 метр квадрат, укки 3х3 метр квадрат, тасқаралар 2х2,5 метр квадрат, бургут 2х2,5 метр квадрат, носуха 2х4,5 метр квадрат, жайра 2х4,5 метр квадрат, соркуш 3х3 метр квадрат, фазан 1,5х2 метр квадрат темир панжарали қафас (вольер)ларда сақланаётганлиги аниқланди. Ҳамма қафас (вольер)ларнинг паст қисми бетондан бўлиб, сомон ташланган.

     Сақлашга рухсатномаси йўқ бўлган бир бош бўри, бир бош носуха, бир бош жайра, бир бош қирғовул, икки бош қора тасқара, бир бош бургут, бир бош укки, бир бош кал журчи (стервяткик), бир бош қамиш мушуклар ёввойи ҳайвонлар борлиги аниқланди.

      Ўзбекистон Республикаси Олий Мажлис Қонунчилик палатаси депутати Инна Коржикова, Навоий вилояти Экология бошқармаси бошлиғи, бошқарма давлат инспекторлари, Тошкент шаҳридаги “Тошкент ҳайвонот боғи” МЧЖ мутахассислари, вилоят Ветеринария ва чорвачиликни ривожлантириш бошқармаси ходимлари ҳамда оммавий ахборот воситалари иштирокида  жорий йилнинг 19 декабрь куни ҳайвонот боғи раҳбарига кўрсатиб ўтилган камчиликлар белгиланган муддатда бартараф қилингунга қадар вақтинча сақлаш учун Тошкент шаҳридаги “Тошкент ҳайвонот боғи”га юборилди.

     Депутатимизнинг сайловчиларни ташвишлантираётган муаммоларни жойида ўрганиш ва бартараф этишга қаратилган амалий учрашувлари давом этмоқда.

Акбар ЖАЙНАРОВ,

Ўзбекистон “Адолат” СДП

Навоий вилоят Кенгаши

матбуот котиби