Карантини қоидалари юмшатилди, бироқ ҳали касаллик тўла чекингани йўқ

Бугун коронавирус пандемияси ва карантин қоидалари хақида  бошидан гапириш шарт эмас.  Юртимизга касаллик кириб келган дастлабки кундан кўрилган чора-тадбирлар ва олиб борилган тарғибот ишлари сабаб барча бирдек бугуннинг талабини тушуниб етди. Бу ўз натижасини берди, дея айта оламиз.

Аксарият ҳудудларда карантин қоидалари юмшатилди. Бироқ бу касаллик тўла ортга чекинди, дегани эмас. Айрим юртдошларимиз ана шундай нотўғри хулосага бораётганидан кўз юмиб бўлмайди. Давлатимиз раҳбари шу сабаб куйинчаклик билан кейинги кунларда коронавирус билан касалланганлар сони республикамизда кўпайганлигини қайд этди.

Аҳоли гавжум жойлар, жумладан, бозорлар, савдо комплекслари, банкларда ижтимоий масофага амал қилиш, тиббий ниқоб тақиш биринчи навбатда ўзингиз учун фойда. Хотиржамликка берилиш ва уйларда турли тадбирлар ўтказишга ҳали эрта. Негаки ана шундай салбий холатлар касалликка қарши курашиш йўлидаги ҳаракатларимизга зиддир. Қолаверса, бунинг учун давлат ҳисобидан катта миқдорда маблағ сарфланаётганини унутмаслигимиз керак.  

Андижон вилоятлар кесимида олганда энг аҳоли зич жойлашган ҳудуд. Тартиб ҳам шунга яраша бўлиши шарт. Шифокорлар билан бир сафда халқ вакиллари ва фаоллар жамоатчилик орасига кириб бориб, фуқароларни ўз саломатлигига янада эътиборли бўлишга чақирайлик. 

 Айрим ишлаб чиқариш корхоналарининг бир муддат фаолият юритмаганини тўғри қабул қилишимиз лозим. Пандемиянинг иқтисодиётимизга таъсирини юмшатишга қаратилган 16 та ҳужжат қабул қилинди. Уларнинг ижросини таъминлашда ҳам тартибни унутмайлик. Буларнинг барчаси тождор душман номли касалликдан сақланишга хизмат қилади.

Ўткирбек АРЗИҚУЛОВ,

Ўзбекистон “Адолат” СДП

Андижон шаҳар Кенгаши раиси