Кичик плагиаторлик – катта адолатсизлик (устига устак, эплаб кўчиролмаса...)

“Миллий тикланиш” ДП газетаси вакиллари жорий йил 11 март санасида https://t.me/altruist_info телеграм каналимдаги мақолани ўз газеталарида кўчириб, ўзга бир муаллиф номидан босишганини бир қатор “чўпчак”чалари билан оқлашиб жавоб ёзишибди. Шунингдек, телеграм каналимизнинг аъзолари камлигини айтиб, “Адолат” газетаси “ALTRUISTга ўхшаган арзон ТКларни қўллаб-қувватлаётгандир” жумласини ишлатибди.

Ҳурматли чала кўчирмакашлар, аввало телеграм каналининг номини тўғри ёзиб кўчиринг.

ALTRUIST канали айрим манқурталарча эргашадиган шахсларга тегишли каналларга ўхшаган канал эмас.

“Адолат” газетасининг ўз йўли бор, бирор телеграм каналини ҳимоя қиладиган даражада бекорчи эмас. “Миллий тикланиш” газетасининг бугунги услуби ҳам қайси газетадан кўчирилгани эса барчага маълум.

Мен мақолани мустақил сайловчининг фикри тарзида билдирганман. Агар мақолам маъқул тушиб, кўчирган экансизлар, парламент фракциялари нега жим турганини аввало ўз партия раҳбариятингиздан ва фракциянгиздан сўрашингиз керак эди.

“Миллий тикланиш” газетаси бош муҳаррири Миродил Абдураҳмонов телевидениедаги чиқишида мақолани facebookдаги “Депутатлар минбари” блогидан шахсан ўзи танлаганлигини ҳақидаги “чўпчагини” ишлатибди. Гўёки мақола маъқул тушгану унинг муаллифини тополмаганмиш. Айнан “Депутатлар минбари” блогида мақолам кўрга ҳассадек қилиб фамилиям ва расмим билан билан чоп этилган.

Саволни энди аниқ йўналтираман. “Миллий тикланиш” ДПнинг парламентдаги фракцияси қайси позицияни танлайди? Бу барчага қизиқ. Ҳозирча икки йўл бор партия олдида. “Демократик блок”да бўлиш учун юз керак, иккинчи тахмин - чорасизликдан “Мухолифат” позицияда бўлиш.

Умид Арслонбеков (агар шахс амалда мавжуд бўлса)га гапим: жиддийроқ баҳс-мунозарага сиз тайёрмисиз? Балки сиз билан суҳбатни парламент ва партияларнинг моҳиятини англаб етганингиздан кейинга қолдирармиз. 

ALTRUIST канали аъзолари бугунги кунда бор йўғи 147 нафар бўлса ҳам ундаги айрим мақолаларнинг ўқувчилари сони 5 минг нафардан ошмоқда. Хаттоки республика даражасидаги газеталар ҳам ундан фойдаланяпти. Баъзи газеталар каби сохта тиражлар билан чоп этилиб, ҳудудий бўлимларида чанг босиб ётгани йўқ.

Умуман олганда, ALTRUIST – шахсий канал, унга партиянинг алоқаси йўқ. Уни “Адолат”нинг “қизалоқ корхонаси” ёки “эмизикли боласи”га ўхшатмаслик учун ижтимоий тармоқлардаги блогларнинг функциясини тушуниб олишнинг ўз кифоя.

“Миллий тикланиш” иддао қилганидек, биз асло буни “йил воқеаси”га айлантириш ниятида бўлмаганмиз. Бир нарсани очиқлаймизки, партиямиз кенг жамоатчилик каби журналистлар учун ҳам очиқ. Интервью сўраб келган мухбирнинг кўксидан итаролмаймиз.

Консервативлар буни “оддий воқеа” деб баҳоламоқда ва жиддийроқ бахсларга чорламоқда. Балки плагиаторликдек (кўчирмакашлик) иллат “Миллий тикланиш” учун одатий ҳолга айланиб улгургандир, аммо биз унга қарши курашиш тарафдоримиз. Зеро, кичик кўчирмакашлик – катта адолатсизлик.

Ҳа-я, “Миллий тикланиш” газетаси ушбу хато учун расман узр сўрабди. Хўп, кечирдим...

Зеро, биз “Миллий тикланиш”нинг хато қилишини кутмаяпмиз, аксинча, хатоларни такрорламаслигини кутяпмиз. Ҳар ҳолда, партия “Кутинг” деб хатоларга ишора бермагандир.

Фаррух АБДУҲАМИДОВ,

“Адолат” СДП Матбуот хизмати сектор мудири