Коррупцияга қарши кураш – бухоролик “Адолат”чиларнинг шиорига айланди

Ўзбекистон “Адолат” СДП Бухоро вилоят Кенгаши томонидан Бухоро туманида “Биз коррупцияга қаршимиз” шиори остида митинг ташкил этилди. Тадбирда партия фаоллари, депутатлар, жамоатчилик вакиллари ҳамда оммавий ахборот воситалари ходимлари иштирок этишди.

Митингдан кўзланган мақсад ушбу иллатга қарши курашиш мақсадида фаолларни бирлаштириш, уларнинг таклифларини, фикр-мулоҳазаларини ўрганиш, бу билан ушбу салбий иллатни илдизигача қуритиш ҳамда  қонунчиликка киритилиши зарур бўлган ўзгартиришлар ва амалий натижаларга эришишдан иборат бўлди.

Тадбирда сўз олган партия вилоят Кенгаши раиси аввало ҳар бир инсон коррупцияга қарши курашишда куч топа олиши, ҳар қандай мақсад йўлида доим адолат билан иш тутиши зарурлигини таъкидлади. Партия сайловолди дастурида қонун устуворлигига алоҳида эътибор қаратилгани, жиноятчиликларга қарши курашиш асосий фуқаролик мақсад эканлигига йиғилганлар эътиборини қаратди. Шунингдек, мамлакатимиз раҳбари томонидан 2017 йилда қабул қилинган “Коррупцияга қарши курашиш тўғрисида”ги қонун моҳияти тўғрисида ҳам тушунчалар бериб ўтилди.

“Адолат”чиларнинг ушбу шиор остида қилган чиқишлари жамоатчилик томонидан қўллаб-қувватланди. “Биз коррупцияга қаршимиз” шиорининг баланд садолар остида янграгани митинг иштирокчиларига куч-қувват бағишлади.

Ўзбекистон “Адолат” СДП

Бухоро вилоят Кенгаши матбуот хизмати