Коррупцияга қарши курашиш – ҳамманинг иши

Ўзбекистон «Адолат» СДП Сурхондарё вилоят Кенгаши ҳамда партиянинг Сариосиё туман Кенгаши томонидан тумандаги Халқ таълими бўлимида “Коррупция – тараққиёт кушандаси” мавзусида тадбир ташкил этилди. Тадбирда партиянинг вилоят ва туман Кенгашлари ходимлари, туман Адлия бўлими ходимлари  ва депутатлар, БПТлар иштирок этишди.

Тадбирни партиянинг туман Кенгаши раиси Муродилло Сангинов очди ва олиб борди.

Тадбир давомида коррупциянинг келиб чиқиши, унинг ижтимоий, иқтисодий ва маънавий зарарлари, коррупцияга қарши курашнинг ҳуқуқий асослари ва механизмлари, Ўзбекистонда коррупцияга қарши кураш бўйича қабул қилинган норматив-ҳуқуқий ҳужжатлари ва уларнинг мазмун-моҳияти, асосий принциплари ҳақида сўз борди.

Шунингдек, йиғилишда олий таълим тизимида коррупцияга қарши кураш тобора қатъий бўлиб бораётгани, бу борада тўхтовсиз профилактик тадбирлар ташкил этилаётганига қарамай, ҳанузгача олий таълим муассасаларига ўқишга киритиб қўйиш масаласи билан боғлиқ фирибгарлик ҳолатлари аниқланаётгани таъкидланди. Бундай салбий ҳолатларнинг рўй бермаслиги учун коррупцияга қарши кураш бўйича олиб борилаётган чора-тадбирларга алоҳида тўхталиб ўтилди.

Абдулла Жалилов, Халқ депутатлари Сариосиё туман Кенгаши депутати:

-   Мамлакатимизда ҳам сиёсий, ҳам иқтисодий ислоҳотларни ҳаётга татбиқ этиш пайтида коррупция жиддий тўсиқ бўлаётгани жамоатчиликни ташвишга солмоқда. Шу боис Юртбошимиз бошлаб берган жамиятни демократлаштириш, модернизациялаш жараёнлари қийинчилик билан давом этмоқда. Коррупция - миллий тараққиётимизнинг душмани, жамоат назорати эса уларга қарши курашда ожизлик қилаётгани ҳам афсуски бор гап. Мамлакатда коррупция схемалари, меҳнат қилмасдан тезда бойиб қолиш механизмлари, ишланган усуллари “занжири” узиб ташланмас экан, давлатимизнинг ҳар қандай сиёсий, иқтисодий ислоҳотини ҳаётга олиб кириш, халқни фаровон қилиш вазифаси қоғозда қолиб кетаверади.

Мухтасар айтганда, коррупция — тараққиёт кушандаси, хавфсизликка таҳдид туғдирувчи хавфли жиноят. Бу иллатга қарши курашиш тегишли органларнинггина эмас, барчанинг иши бўлиши зарур. Шундагина биз ушбу хавфни бартараф этган бўламиз.

 Фахриддин ОРИФХОНОВ,

Ўзбекистон “Адолат” СДП Сурхондарё вилояти Кенгаши раис ўринбосари