Менда таклиф бор: Гепатит “А”га қарши эмлаш нега пулли?

Ўзбекистон “Адолат” социал-демократик партияси томонидан ишлаб чиқилган сайловолди дастур лойиҳаси кенг жамоатчилик орасида муҳокама этилаётганини жуда ўринли, деб биламан. Имкониятдан фойдаланиб, қуйидаги таклифларимни бермоқчиман.

Биринчи таклифим: Ташкилотимизда 26 нафар шифокор ва 80 нафар ўрта махсус  тиббиёт ходимлари  фаолият юритмоқда. Шу вақтгача биронта ҳам ходимимиз чет давлатларда тажриба олиш имкониятига эга бўлмаган. Соҳа бўйича чет давлатлар тажрибаси ҳам қўлланилса, фаолиятимиз самарадорлиги янада ошган бўлар эди.

Иккинчи таклифим:  Маълумки, хозирги кунда 1 ёшдан 14 ёшгача бўлган болалар орасида  юқумли  гепатит  “А” касаллиги куз, қиш  ойларида кўпайиб, кўплаб оилаларга ҳам руҳан, ҳам моддий томондан муаммолар келтирмоқда. Вирусли Гепатит “А” вакцинаси эмлаш  режасига киритилмагани боис кам таъминланган, ногирон болаларнинг оиласида моддий томондан қийинчиликлар кузатилмоқда. Хусусан, ота-оналар болаларига битта вакцинани сотиб олиш учун 185 минг сўм сарфлаши керак. Боқувчисини йўқотган болалар ҳам бундан мустасно эмас. Демак, вакцинани сотиб олиш учун шароити бўлмаган ота-оналар касалликка чалинган фарзандини даволатиши учун 1 ярим миллиондан 2 миллионгача маблағ сарфлаши керак. Шунингдек,  6 ойгача тўлиқ пархез тутиши, 6 ойдан бир йилгача оғир юк кўтармаслиги, жисмоний тарбия билан шуғулланмаслиги талаб этилади. Вакцина билан эмланган болаларда эса юқори иммунитет пайдо бўлиб, 15 йилгача юқумли гепатит “А” касаллигига чалинмайди.

Вирусли гепатит “А” вакцинаси фақат чет мамлакатлардан олиб келинмоқда. Агар мамлакатимизда ҳам вакцинани ишлаб чиқариш йўлга қўйилса, мақсадга мувофиқ бўлар эди.

Зокир ҚЎЧҚАРОВ,

Урганч шаҳар Давлат санитария-эпидемиология назорат

Маркази бош шифокори