Мурожаатнома: мақсад, вазифа, ёндашув, режа, натижа

“Адолат” СДП Тошкент вилояти  Кенгаши томонидан Президентимизнинг Олий Мажлисга йўллаган Мурожаатномаси муҳокамасига бағишланган онлайн семинар бўлиб ўтди.

Унда партиянинг туман ва шаҳар Кенгашлари раислари, депутатлар,  “Аёллар қаноти”, “Ёш адолатчилар” қаноти Кенгашлари ва “Ёшлар парламенти”, “Адолатнинг фаол адолатчи аёллар клуби” аъзолари, партиянинг фаол аъзолари иштирок этди.

Тадбирда сўзга чиққан вилоят Кенгаши раиси Б.Мамиров Мурожаатноманинг мазмун-моҳияти, айниқса, унда белгилаб берилган устувор вазифалар борасида  атрофлича фикр юритди.

Қайд этилганидек, таълим тизимидаги инновацион ёндашувлар ва ёшларимизни ҳар томонлама қўллаб-қувватлаш, давлатимизнинг таълим ва ёшларга бўлган эътиборининг нақадар юксак эканлигидан далолат беради.

Халқ депутатлари Бекобод шаҳар Кенгаши депутати Г.Шарипова ўз фикрлари билан ўртоқлашар экан, бундан буён давлат харидлари жамоатчилик ва парламент назорати остида бўлиши, келгуси йилдан банклараро валюта бозори онлайн тизимга ўтказилиши, тадбиркорларга валюта маблағларини банкнинг ўзида сотиб олиш имкониятларининг яратилиши,  тадбиркорлик йўналишида янги имкониятлар очиш,  халқ фаровононлигини таъминлашнинг муҳим омиллари ҳисобланишини  таъкидлаб ўтди.

Тадбирда иштирок этган Халқ депутатлари Бекобод шаҳар Кенгаши  депутати,  шаҳардаги 1- оилавий поликлиника бош шифокори Ф.Асадова Мурожаатномадан келиб чиқиб,  ўз эътиборини тиббиёт масалаларига қаратар экан, хусусан,  пандемия сабоқларига биноан  тиббиёт соҳасини рақамлаштириш кўлами янада кенгайтирилаётганини, жумладан, поликлиника ва касалхоналарни электрон иш юритишга ўтказиш чоралари кўрилаётганини маълум қилди. Шунингдек, республика ихтисослашган тиббиёт марказлари ва уларнинг филиаллари ўртасида телемедицина йўлга қўйилиб, диагностика ва даволаш учун жойлардаги имкониятлар янада кенгайтирилаётганлига эътибор қаратилди.

Тадбир якунида фаоллар ўзаро фикр-мулоҳазалар алмашдилар ҳамда  олдинда турган долзарб масалалар бўйича келгуси режалар белгилаб олиниб,  уларни амалга ошириш бўйича чора-тадбирлар тузилди.

Вилоятнинг барча туман ва шаҳар Кенгашларида Мурожаатноманинг моҳиятини ўрганишга қаратилган тадбирларни ўтказиш жойларда давом этмоқда.

Фотима САТТОРОВА,

Ўзбекистон “Адолат” СДП

Тошкент вилояти Кенгаши матбуот котиби