Мурожаатномада коррупциянинг олдини олиш муҳимлиги таъкидланди

24.01.2020 23:01:58

Мамлакат раҳбарининг Олий Мажлиснинг Сенати ва Қонунчилик палатасига қилган Мурожаатномаси шубҳасиз, барчамизнинг масъулиятимизни ошириш баробарида эътиборимизни ҳам жалб этди. Албатта, кейинги ҳаёт тарзимизни, иш фаолиятимизни бир маромда олиб боришимиз учун муҳим ҳужжат бўлди десам, адашмаган бўламан.

Мурожаатномада коррупция масаласига алоҳида урғу берилди.

Дарҳақиқат, мамлакат раҳбари таъкидлаб ўтганидек, коррупция билан ҳақиқий ишбилармонлик ва инвестиция муҳитини яратиб бўлмайди. Президент коррупциянинг олдини олиниши мақсадида ўз таклифларини билдириб ўтди. Хусусан, “Коррупцияга қарши курашишда аҳолининг барча қатламларига энг яхши мутахассислар жалб қилинмас экан, жамиятимизнинг барча аъзолари, таъбир жоиз бўлса, “Ҳалоллик вакцинаси” билан эмланмас экан, ўз олдимизга қўйган юксак марраларга эриша олмаймиз” дея қайд этди. Бу таъкид барчамизни огоҳликка чақиради ва ҳалол ишлаб, жамиятда муносиб ўрин эгаллашимизда туртки бўлади. Айниқса, парламент ва Президентга ҳисоб берадиган, коррупцияга қарши курашишга масъул бўладиган алоҳида орган ташкил этиш билан боғлиқ таклифнинг киритилганлиги барча соҳаларда ривожланишни, юртимиз эгаларининг мустаҳкам билим олишларини, тиббиётда сифатли тиббий тизимнинг яратилишини, жамиятнинг мустаҳкам қўрғонининг яратилишини таъминлашда муҳим пойдевор бўлади.

Бугунги кун талабидан келиб чиққан ҳолда жамиятнинг ҳар бир бўғини фаолиятига нисбатан эътибор билан ёндашиши, ушбу иллатга қарши курашишда ўзида куч топа олиши шарт. Шундагина мамлакатимиз равнақи учун ўз ҳиссамизни қўша оламиз, юрт учун ёниб яшайдиган авлодларни тарбиялай оламиз, жамиятда муносиб ўринга эга бўла оладиган кадрларни шакллантира оламиз. Зеро, Мурожаатномада “Биз коррупциянинг оқибатлари билан курашишдан унинг барвақт олдини олишга ўтишимиз керак” дея айтиб ўтилган фикр ҳам ҳаёт тарзимизни шакллантирувчи шиор бўлиши шарт!

Рауф СУВОНОВ,

Ўзбекистон “Адолат” СДП

Бухоро вилоят Кенгаши раиси ўринбосари  

Улашинг!

Фикрингизни қолдиринг

Илтимос жавобингизни киритинг

+