Наманганда “Депутат куни”

         Ўтган жума куни Наманганда “Адолат” СДП Наманган вилоят Кенгаши томонидан ўзига хос “Депутат куни” ўтказилди. Унда маҳаллий кенгашларга сайланган депутатлар, партиянинг шаҳар ва туман кенгашлари раислари, фаоллар иштирок этдилар. Тадбир иштирокчилари Ўзбекистон Республикаси Президентининг шу йил 24 январдаги Олий Мажлисга Мурожаатномаси ва партиянинг Сайловолди дастуридан келиб чиқадиган вазифаларни муҳокама қилдилар.

         Сўзга чиққан Ўзбекистон “Адолат” СДП Наманган вилоят Кенгаши раиси Исроил Жўраев, раис ўринбосари Баҳодир Болтабоев, матбуот хизмати котиби Нурбек Абдуллаев депутатлар фаолияти самарадорлигини янада ошириш, сайловчилар билан ишлашни яхшилаш, аҳолини қийнаётган камчилик ва муаммоларни аниқлаш ва бартараф этиш, оммавий ахборот воситалари билан ҳамкорликни мустаҳкамлаш каби масалалар юзасидан фикр-мулоҳаза юритдилар.

         Алишер Қосимов, Халқ депутатлари Наманган вилоят кенгаши депутати:

          – Партиямиз вилоят Кенгаши биз, депутатларга катта амалий ва услубий ёрдам кўрсатмоқда. Мен Чуст туманидаги “Пилол” маҳалла фуқаролар йиғини раиси бўлиб ишлайман. Ўтказилаётган ўқув ва семинарларда олинган билимлар ҳаётнинг ҳамма жабҳасида қўл келмоқда. Қонунчиликни қанчалик яхши билсак, одамларнинг дардини тинглай олсак, уларни ўйлантираётган муаммоларни пухта ўргансак, ечим топиш ҳам осонлашади, албатта.

         Тушдан кейин эса тадбирнинг иккинчи қисми – ўқув семинари бўлиб ўтди. У вилоят адлия бошқармаси ва фуқаролик жамиятини ривожлантириш маркази ҳудудий бўлинмаси билан ҳамкорликда ташкил этилди. Дастлаб адлия бошқармаси ҳуқуқий тарғибот ва маърифат бўлими бошлиғи Наима Ядгарова “Ўзбекистон Республикаси Президентининг “Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида”ги Фармониниг мазмун-моҳияти ҳақида сўзлаб берди. Иштирокчилар шунингдек, Фуқаролик жамиятини ривожлантириш вилоят ҳудудий бўлинмаси раҳбари Нигора Нуралиеванинг “Қонун устуворлигини таъминлаш йўлидаги кенг кўламли ислоҳотларни амалга оширишда депутат ҳуқуқи, мажбурияти ва мақоми” мавзуидаги маърузасини тингладилар.

         Семинар кун тартибидаги масалалар юзасидан савол-жавоблар билан якунланди.

Фарҳодбек АБДУЛЛАЕВ,

Ўзбекистон “Адолат” СДП фаоли