Ўзбекистон “Адолат” социал-демократик партияси Сиёсий Кенгашининг мамлакат аҳолисига МУРОЖААТИ

23.05.2020 15:05:04

Қадрли ватандошлар!

Эртага мамлакатимизда кенг нишонланадиган Рамазон ҳайити барчангизга муборак бўлсин! Рамазон байрами юртимизга тинчлик, хотиржамлик, ҳар бир оилага фаровонлик, барчамизга бахт-саодат келтирсин!

Бу йилги Рамазон ойи рўзадорлар учун жуда қулай келди. Айниқса, об-ҳавонинг салқин келиши рўзадор кекса авлод вакиллари учун айни муддао бўлди. Бу рўзадорларга аллоҳнинг марҳамати бўлса, ажаб эмас. Шундай қилиб,  бугун муборак Рамазон ойининг сўнгги соатларини чексиз шукроналик ва дилда ихлос билан ўтказяпмиз. Яратгандан махфират сўраш баробарида юртимиз ободлигини, халқимиз фаровонлигини сўраб дуолар қилаяпмиз.

Айниқса, кейинги пайтларда бутун дунёни саросимага солиб турган коронавирус эпидемиясинидан тезроқ қутқаришни Парвардигордан сўраб турибмиз. Қарангки, ўз вақтида кўрилаётган кескин чора-тадбирлар эвазига республикамизда ижобий натижаларга эришилмоқда. Аммо, кўплаб давлатларда янги-янги инфекция ўчоқлари пайдо бўлаётган бир пайтда ҳушёрликни йўқотмаслигимиз даркор. Бунинг учун Махсус комиссия қарорлари асосида ўрнатилган карантин чекловларига қатъий амал қилишимиз, мавжуд вазиятнинг ижобий тарафга ўзгаришида муҳим аҳамият касб этади.

Азиз юртдошлар!

Муборак айём — Рамазон ҳайити кунлари барчамиздан мамлакатимизда белгиланган тартиб-тамойилларга амал қилишимиз, жорий қилинган карантин қоидаларини тўла адо этишимиз бугун барчамизнинг вазифамизга айланиши лозим.

Муҳтарам Президентимизнинг “Рамазон ҳайитини нишонлаш тўғрисида”ги Қарорида ҳам бу йилги Рамазон ойи коронавирус пандемияси туфайли оила даврасида, ўзаро аҳиллик ва ҳамжиҳатликда ўтгани ҳолда, Рамазон ҳайити байрами ҳам карантин талабларига мувофиқ ўтказилиши эслатиб ўтилган.

Бу бежиз эмас, албатта. Бунда халқимиз, миллионлаб инсонларнинг саломатлиги кўзда тутилган. Битта ўйланмай ташланган қадам ёки ноўрин ҳаракат билан бир қанча одамларга касаллик юқтираётган ҳолатлар ҳам йўқ эмас, ахир. Шу сабабли, Ўзбекистон мусулмонлари идораси Уламолар Кенгашининг 2020 йил Рамазон ҳайитини нишонлаш тўғрисидаги Баёнотида ҳам бу масалага алоҳида тўхталиб, рамазон ҳайити намозини ҳар ким ўз уйида ўқиши тавсия қилинмоқда. Биз бундан тўғри хулоса чиқаришимиз керак.

Айниқса, Ўзбекистон «Адолат» социал-демократик партиясининг кўп минг сонли аъзолари, депутатлари, барча фаоллари шу кунларда ўрнак кўрсатиши лозим бўлади. Албатта, халқимизга хос фазилатлар бор: ҳайит кунлари ёши улуғ кексалар ва беморлар ҳолидан хабар олиш, қўни-қўшниларни ҳайит билан табриклаш. Бундай ҳолларда карантин талабларига қатъий амал қилишни сўраймиз. Зеро, сизнинг ташрифингиз қайсидир хонадонни ташвишга солмасин. Албатта, бу чекловлар вақтинча. Қанчалик биз аҳиллик билан, ҳамжиҳатлик билан короновирусга қарши курашни давом эттирсак, ундан шунчалик тез қутилишимиз аниқ.

Ўзбекистон «Адолат» социал-демократик партияси мамлакатда тиббий маданиятни юксалтириш бўйича бир қанча лойиҳаларни илгари суриб келмоқда. Қаерда тиббий маданият юқори бўлса, албатта аҳоли саломатлиги ҳам шу қадар юқори бўлади. Ўзбек халқи азал-азалдан тиббий маданиятга алоҳида эътибор қаратган, ҳар доим турли юқумли касалликлардан ҳимояланиш чораларини кўрган, ўзини ўзи иҳота қилишни яхши билган халқ. Ўйлаймизки, бугунги кунларимиздаги бир-биримизни ва ўзимизни эҳтиёт қилишимиз отабоболаримиз бошлаб берган йўлимизнинг давоми бўлади, албатта. 

Халқимизнинг яна бир ҳавас қиладиган урф-одатларидан бири ҳайит кунлари қучоқ очиб кўришиш. Ўйлаймизки, бугун бундай меҳр улашишнинг мавруди эмас. Ҳар биримиз албатта, ижтимоий масофани сақлашимиз, қўлни қўлга бермасдан масофадан саломлашишимиз, хонадонма-хонадон юрмаслигимиз, тўпланмаслигимиз бугунги кунда жуда зарур. Ҳозирги вазиятдан келиб чиққан ҳолда, урф-одатларимизни кейинги ҳайитларга қолдиришимиз адолатдан бўлади. Яқин кунларда бир биримизни бағримизга босиб табриклаш имкониятлари яна қайтади.

Азиз ватандошлар! Рамазон ҳайити айёми барчангизга муборак бўлсин! Унинг шарофатидан ҳар биримиз барҳаманд бўлишимизни Яратганнинг ўзи насиб этсин!

Улашинг!

Фикрингизни қолдиринг

Илтимос жавобингизни киритинг

+