Партия вакилларининг давлат рамзига ҳурмати чексиз

Давлат рамзлари қаерда бўлмайлик, ­Ватанимизнинг бир бўлаги эканимизни эслатиб туради. Жумладан, байроғимиз ҳам шундай. У — тарихимиз, бугунимиз, келажагимиз. Бугун у бутун жаҳон кўз ўнгида намоён. Зеро, байроғи баланд элнинг юраги ҳам, қадди ҳам, ўзи ҳам баланд. Байроғимиз юксакларда тебранар экан, ­навқирон юрт фарзандлари бугун ҳам улуғ ишларга қодир эканини исботлашга ундайди. Байроқ бизни жаҳон аҳли тан олган буюк аждодларимизга муносиб ворис бўлишга чорлаб туради.

Ўзбекистон Республикаси Давлат байроғи қабул қилинган кун мамлакатимизда катта байрам сифатида кенг нишонланмоқда. Мазкур тадбирлар давлат рамзларига нисбатан ҳурмат туйғуларини янада юксалтириш мақсадида ўтказилмоқда.

Биз у билан чексиз фахрланамиз ва ардоқлаймиз. Турли халқаро анжуманларда унинг мағрур ҳилпираб турганини кўрганимизда қалбимиз қувончга тўлади. Айниқса, ҳалқаро мусобақаларда спортчиларимиз қўлга киритган ютуқлар эвазига байроғимиз юксакликка кўтарилганида шукроналик ҳисси чулғаб олади.

Дарҳақиқат, байроқ давлат суверенитетининг рамзидир. Шундай экан, биз уни ҳар қанча эъзозласак, эҳтиром ва ҳурмат кўрсатсак, арзийди. Бугун “Адолат” СДП фаоллари жойларда мазкур сана билан боғлиқ қатор тадбирлар ўтказдилар. Уларда давлатимизнинг мазкур рамзи ҳақида дилдан фикрлар билдирилди. Иштирокчилар давлатимиз байроғи замин узра абадий ҳилпираб туришини тиладилар.

“Адолат” СДП Матбуот хизмати