“Порталбоз”нинг муддаоси не?

Аҳоли билан сайловолди учрашувларимда ҳудудда муаммолар кўп эканлигидан шикоят қилишган эди. Қибрай туманидаги  “Бойжигит” ва “Мирзо Улуғбек” маҳаллаларида чинданда бугун талай муаммолар мавжуд.

Мана, депутатлик ҳам насиб этди. Ҳар икки маҳалла мутасаддилари билан бўлган учрашувда ечимини кутаётган муаммолар ҳақида суҳбатлашиб, уларни бартараф этиш йўлларини изладик. “Бойжигит” МФЙ мутасаддиларини ичкиликка ружу қўйган, нотинч ва ноқобил оилалар рўйхатида турувчи бир оиланинг муаммоси анчадан бери қийнаб келар экан. Оила аъзолари ҳеч бир ерда ишламас, қари онасининг пенсиясига кўз тикиб, пенсия келиши биланоқ ичкиликка муккасидан кетадиган уч қиз бугун Ўзбекистон Республикаси Президенти қабулхонасига тўхтовсиз шикоят қилишни одат тусига айлантирибди. Ҳеч ерда ишламай, йиллар давомида яшаб турган уйининг тўловларини тўламай келар экан. Яна бу уйнинг ҳақиқий эгасини кўп йиллар аввал уйдан ҳайдаб юборишган экан, уйнинг асл соҳиби катта бўлиб, ақл ҳушини таниб, мерос бўйича уйни ўз номига расмийлаштирибди ва уйни бўшатишларини талаб қилиб, судлашиб, ўз ҳақини талаб қилган. Ҳақиқат қарор топибдию, лекин бир умр боқиманда бўлганларнинг пайтавасига қурт тушиб, энди “порталбоз”ликни бошлаб юборишибди. Хуллас, бу ҳам бир бошоғриқ. Қолаверса, кўп қаватли уйларда Уй-жой мулкдорлар ширкати ишламайди, йиллар давомида аҳоли томонидан тўланган пулларнинг халқ ҳисобини олмайди, унинг ҳисоби берилмаган ва аҳоли нима учун пул тўлаётганини билмайди, гўё. Шаҳар бедарвоза эмас-ку ахир!

Юзма-юз мулоқотларда аниқланган мазкур муаммоларни мутасадди ташкилотлар билан ҳамкорликда ҳал этиш чораларини белгилаб олдик.

Дониёр ЮСУПОВ,

Халқ депутатлари Қибрай туман Кенгаши депутати