Президентимиз билдирган ишонч юксалиш сари ундади

Мен Ўзбекистондек келажаги буюк давлатнинг фарзанди эканимдан бахтлиман.

Давлатимиз томонидан ёшларга қаратилган имкониятлар ҳеч бир мамлакатда   бўлмаса керак.

Бундай бахтни  иқтидоримни, истедодимни юзага чиқариш учун берилган имкониятларни дилдан ҳис қилганимда  қалбим ғурурга тўлади.

Қувонарлиси, ўз иқтидоримни юзага чиқаришда, жамиятда муносиб ўрнимни эгаллаб боришимда Ўзбекистон “Адолат” СДП Хоразм вилоят Кенгашининг  ҳизматлари беқиёсдир. 2018 йилнинг бошидан партиянинг фаол аъзоси сифатида  партия фаоллари томонидан  маънавий рағбат олиб келмоқдаман. Уларнинг менга билдирган ишончи ва қўллаб-қувватлашлари сабаб бир қатор ютуқларга эришдим.

Жумладан, партия Хоразм вилоят Кенгаши қошида ташкил этилган “Истеъдод” клубининг  аъзоси сифатида 2017 йилда “Адолат дўпписи” га сазовор бўлдим ва вилоят Кенгашининг бир қатор ташаккурномалари билан тақдирландим. 2018 йил 9 ноябрда Ўзбекистон “Адолат” социал-демократик партиясининг “Ватан келажаги ёшлар қўлида” лойиҳаси доирасида ўтказилган “Конституция билимдони”  Республика кўрик-танловининг Хоразм вилояти босқичида I- ўринни эгаллаб, республика босқичида фаол иштирок этдим ва партия Сиёсий Кенгашининг диплом ва китоблар жамланмаси билан тақдирландим.

Шунингдек,  мен ҳозирги кунда  маданият йўналишининг сухандонлик, маданий-маърифий тадбирлар ташкилотчиси йўналишида фаолият олиб бориш билан бирга халқаро конференциялар делегацияси таркибида ҳам иштирок этиб келмоқдаман. Шунингдек, бугунги кунда УрДУ “Қизларжон клуби” раиси ҳамда “Қизлар овози клуби” Қўшкўпир тумани координатори этиб сайланганман.  

Умумтаълим фанлари бўйича ўтказилган “Билимлар беллашуви”нинг вилоят, республика босқичларида тарих фани бўйича қатнашиб, фахрли ўринларни эгалладим.

2018 йилда умумтаълим фанлари бўйича академик лицейлар ва касб-ҳунар коллежлари ўртасида ўтказилган Республика фан олимпиадасининг вилоят босқичида I ўринни,  шу йили “Юксак маънавиятли авлод” республика фестивалининг  “Мустақиллик тарихи билимдони” номинацияси бўйича вилоят босқичида I- ўринни эгаллаб, республика босқичига йўлланма олдим ва фаол иштирок этдим.

2018 декабрда Олий Мажлис Қонунчилик палатасидаги Ўзбекистон “Адолат” СДП фракциясида “Конституция — инсон ҳуқуқ ва эркинликларининг кафолати” мавзусидаги конференцияда қатнашдим.

2018 йил якунида Ўзбекистон Ёшлар Иттифоқи томонидан ўтказилган “Иттифок мукофоти”га номзодларни саралаш республика боскичида “Йилнинг энг яхши ёш ижодкори”номинацяси бўйича тақдирландим.

2019 йилда умумтаълим фанлари бўйича академик лицейлар ва касб-ҳунар коллежлари ўртасида ўтказилган Республика фан олимпиадасининг вилоят босқичида I -ўринни эгаллаб, республика босқичига йўлланмани қўлга киритдим.

2019 йилда “Ёшларнинг маънавий-ахлоқий онгини шакллантиришнинг ижтимоий-фалсафий хусусиятлари” мавзусидаги республика илмий-амалий конференцияда фаол иштироки учун Ўзбекистон Республикаси Олий ва ўрта махсус таълим вазирлиги томонидан сертификат билан,  2020 йилда “Ўзбекистонда илмий-амалий тадқиқотларда талабаларнинг ўрни” номли масофавий (онлайн) конференцияда фаол иштироки учун Ўзбекистон Ёшлар Иттифоқи томонидан сертификат билан тақдирландим.

2020 йил 17 ноябрда Мудофаа вазирлиги тизимида ўтказилаётган тадбирларда фаол иштироки учун Мудофаа вазирлиги томонидан фахрий ёрлиқ билан тақдирланганман.

2019-2020 йиллар давомида 20 дан ортиқ Халқаро, 30 дан ортиқ Республика миқёсидаги анжуман, конференция ва саммитларда қатнашиб, номинацион сертификат ва дипломлар билан тақдирланганман.

2020 йилда Халқаро онлайн таълим платформасида дунёдаги энг нуфузли АҚШдаги Мичиган, Виржиния ва Жанубий Каролина университетлари ҳамда Буюк Британиядаги Лондон университетида бепул равишда таълим олиб, курснинг халқаро сертификатларини муваффақиятли қўлга киритганман. Бундан ташқари, АҚШдаги Мичиган университетида “Журналистика” бўйича профессионал сертификат (мутахассислик сертификати)ни қўлга киритганман.

Бугунги кунда АҚШдаги Мичиган университетида “Fundamentals of International Law” (“Халқаро ҳуқуқ асослари”) курсида бепул профессионал сертификат (мутахассислик сертификати)ни қўлга киритиш учун таълим олиб келмоқдаман.

12-13 декабрда Президентимизнинг Хоразм вилоятига ташрифи давомидаги учрашувда қатнашиб, ўз таклифларинимни билдириб ўтдим. Таклифларим Президентимиз томонидан қўллаб-қувватлангани ҳаётимда унутилмас  воқеаликка эга бўлди. Президентимизнинг  самимий тарзда  менга билдириган ишончи зиммамга янада кучлироқ масъулиятни юклади. 

Яна бир қувончли дақиқаларим, 2020 йил 25 декабрда илк маротаба Президент иштирокида ўтказилган “Ўзбекистон ёшлари форуми”да  иштирок этганимдир.

Ўзбекистонни  бахтли фарзанди сифатида, юртим тараққиёти, мамлакатимиз  ривожи учун бор имкониятимни, истеъдодимни сафарбар этишга ваъда бераман.

                                                                                             Сарвиноз  ЖУМАНИЁЗОВА,

                                                                                        УрДУ талабаси, партия фаоли