Қадринг баланд бўлсин, она тилим!

22.10.2020 12:10:56

Ҳар бир юртнинг ўз давлат тили бўлгани каби бизнинг ўзбек тилимиз хам миллий она тилимиз хисобланади. Ўз тилига содиқ баркамол юрт фарзандлари сўзлашув жараёнида тилнинг бузилмай хатосиз талаффуз қилиниши ва ёзилиши тилга бўлган хурматнинг юқорилигидан дарак беради. Она тилимизнинг софлиги, қадрини юксалтириш миллийлигимизни қадрлаш билан баробар. Чунки, бу тил асрлар силсиласидан бизгача етиб келди ва бугун биз ўзимизни бахтли инсон санашимиз лозимки, боболаримиз орзулари рўёбида биз яшаяпмиз. Тилимизнинг бой тарихига назар ташлайдиган бўлсак, Қутадғубилик ва Билгахоқонларга бориб тақалади. Демакки,  буюк аждодлардан бизгача етиб келган ўзбек тилини биздан кейинги авлодларга ҳам  хатоларсиз етказиш ҳар биримизнинг бурчимиз. 

Тарихий сана - 1989 йил 21 октябрь соф тилимизни бизга эркинлик асосида қайтарди бу санани байрам қилишга тўла ҳақлимиз. Бу борада барча ташкилотларда ушбу сана муносабати билан тилимизга эҳтиром кўрсатилади. Жумладан, Ўзбекистон “Адолат” СДП вилоят Кенгаши ташаббуси билан Бухоро давлат унверситетида “Қадринг баланд бўлсин, она тилим” шиори остида давра суҳбати ташкил этилди. Унда адабиётшунос олимлар, Ёзувчилар уюшмаси аъзолари ва унверситет талабалари фаол иштирок этдилар.

Миллат тафаккурининг бебаҳо ҳазинаси саналган тил  улкан бойлигимиз сифатида ижтимоий ҳаётда муҳим аҳамият касб этади. Унга битилган таърифу - таснифлар барчамизни онгу шууримизни янада бойитишга хизмат қилиб келмоқда.

Тадбирда таъкидланганидек, буюк қадриятларга бешик бўлган  она тилимизни жаҳон минбарида янграшини бошлаб берган Юртбошимиз барча ёшлар қалбида “Мен ҳам ўз тилимни жаҳон майдонида таратаман” деган хулосага олиб келгани аниқ. Муҳтарам юртбошимиз БМТ бош ассамблеясида ўзбек тилида онлайн нутқ сўзлар эканлар, бу ҳам ўзлигимизни яна бир карра жаҳонга танитишнинг ёрқин исботи бўлди.

 

Зулхумор ТЎРАЕВА,

Ўзбекистон “Адолат” СДП Бухоро 

вилоят Кенгаши матбуот котиби

Улашинг!

Фикрингизни қолдиринг

Илтимос жавобингизни киритинг

+