Қайта тикланаётган манзиллар (Сардоба, Оқолтин ва Мирзаобод туманлари мисолида)

Айни кунларда Сардоба, Оқолтин ва Мирзаобод туманларида талофат келтирган зарарларни бартараф этиш ва ҳудудни қайтадан тиклаш мақсадида кенг кўлмадаги қурилиш-тозалаш ишлари жадаллик билан олиб борилмоқда. Шунингдек, офат ҳудудида уй хўжаликлари ва бошқа инфратузилма объектларидан сувни чиқариб олиш жараёнлари давом этмоқда.

2 май куни зарар кўрган ҳудудларга етиб келган 2 мингдан зиёд ҳарбий хизматчилар ва икки юзга яқин ҳарбий техникалар табиий офат оқибатларини бартараф  этиш мақсадида Сардобадаги “Қўрғонтепа” ва “Софлик” маҳалласидаги кенг кўламли ишларга жалб қилинган. Шунингдек кўнгилли ёрдамчи гуруҳлар сони ва сафи соат сайин ортиб бормоқда. 4 май санаси давомида жами 3450 квадрат метр майдондан 242 минг куб метр сув тортиб олинган, 340 та уй хўжалиги, 9 та инфратузилма объекти ва 4 та фермер хўжалигининг майдонлари сувдан тозаланган. Бу каби ишлар давом этмоқда  ва сув тарк этган ҳудудларни чиқиндилардан тозалаш ишлари билан уйғун тарзда давом этмоқда. Канализация тизимлари, сув тозалаш иншоотлари, қабристонларнинг аҳволи ўрганилиб, дезинфекция қилинмоқда. Кун давомида 1300 та уй ва эвакуация қилинган одамлар бўлиб турган жойлар дезинфекция қилинган.

Депутатлик ўрганишларимиз давомида Сардоба туманидаги “Юртдош” маҳалласида 21 та, “Қўрғонтепа” маҳалалсида 3 та, “Дўстлик” маҳалласида 52 та, Оқолтин туман “Саховат” маҳалаласида 12 та, Мирзаобод туманидаги “Навбаҳор” маҳалласида 11 та, жами 99 та кўп квартирали уйларда ҳам талофат оқибатларини бартараф этиш бўйича чора-тадбирлар амалга оширилмоқда. Тошқиндан зиён кўрган ҳудудлардаги 42 аҳоли пунктининг ичимлик сув таъминоти ҳолати ўрганилди. Унга кўра, 6 та маҳалладаги 7 та сув тарқатиш иншооти ҳамда 124 километрдан ортиқ ичимлик сув қувурларининг жиддий зарар етказилган қисмларини таъмирлаш ишлари йўлга қўйилди. Мазкур иншоотлар таъмирланиб қайта тиклангунга қадар 16 та маҳаллага ичимлик суви махсус сув ташиш автотехникаси билан етказиб берилади.  

Бу каби ишларни воқеа жойига бориб бевосита кузатар экансан, халқ бирлашса, мақсадлар бир томон олиб борса кўпнинг қўлидан ана шундай улуғвор ишлар келишига ишонч ҳосил қиласан. Мен ҳам Халқ депутатлари Сирдарё вилоят Кенгаши депутати сифатида мана икки-уч кундан буён талофатдан жабр кўрган аҳоли билан суҳбатлар ўтказиб, шу нарсага амин бўлдимки, инсоннинг бошига кутилмаганда тушган мусибат бир оз қаддингиз ва руҳингизни букиб қўяр экан. Лекин бугун мен билан суҳбатда бўлган аҳоли вакилларининг кўзида умид учқинларини кўрдим. Талофатнинг дастлабки кунларидаги қўрқув ва “Энди нима қиламиз?” деган ҳадикли саволлар ўрнини бугун эртанги кунга бўлган ишонч эгаллаганига гувоҳ бўлдим. Бунинг сабаби эса бугун улар эътибор ва ғамхўрликда эканликларини, мамлакатимиз Президенти, бутун Ўзбекистон халқи улар учун қайғураётганликларини тўла ҳис қилишмоқда. Партиямиздан номзоди кўрсатилган Халқ депутатлари Сардоба туман Кенгаши депутати Санобар Шукурованинг ҳам кузатишлари ҳам бир нарсани тасдиқлайди. Офатдан талофат кўрган сирдарёликлар келажакка, яна ўз уйларига қайтиш ва хонадонларини аввалгиданда ободроқ кўриниш касб этишига бўлган умид ва ишончни Президентимизнинг халқ билан бўлган самимий мулоқотидан олишди. Кўзида ёш билан юртбошимизнинг сўзлари, таскинларини эшитган жабрланган халқ вакиллари бугун ҳаётга ишонч кўзлари билан боқмоқда. Оқолтин туманида ҳам сув тошқини сабабли эвакуация қилинган “Аҳиллик”, “Бўстон”, “Кўркам диёр”, “Алишер Навоий”, “Саховат” ҳамда “Янги давр” маҳаллалари аҳолисини яшаш манзилларига қайтариб олиб келиш учун автобуслар йўлга чиқиш учун шай. Бир сўз билан айтганда, бугун Сирдарёда ҳамма бир ёқадан бош чиқариб ягона мақсад сари сафарбар этилган: Янги Сардобани қуриш, Оқолтинда кўркам маҳалларини яна тиклаш ва Мирзаободга ободлик нафасини қайтариш.

Дилшунос АБДУЛЛАЕВА,

Ўзбекистон “Адолат” СДП Сирдарё вилоят Кенгаши раиси,

Халқ депутатлари Сирдарё вилоят Кенгаши депутати