Соҳага эътибор берилса, ютуқларга йўл очилаверади

Серқуёш  Ўзбекистонимиз мана 29 йилдирки, мустақил тараққиёт йўлидан бормоқда. Барча тармоқлар қатори қишлоқ хўжалигининг минг –минглаб меҳнат аҳли ҳам пандемия даврида мамлакатимиз иқтисодини мустаҳкамлашга, эл-юрт дастурхонини  тўкин қилиб, саноатнинг хом ашёга бўлган эҳтиёжини  қондиришга астойдил интилмоқдалар.

Давлатимиз  раҳбари мамлакатимиз мустақиллигининг 29 йиллигига бағишланган тантанали маросимда Ўзбекистонда янги бир уйғониш - Учинчи Ренессанс даврига пойдевор яратилаётганини  алоҳида эътироф этдилар.

Дарҳақиқат, ушбу юксалишлар силсиласида вилоятимиз қишлоқ хўжалиги, хусусан қоракўлчилик ва пиллачиликда ҳам ҳар йили бир қатор муваффақиятлар қўлга киритиб келиняпти. Президентимизнинг жорий йил 2 сентябрь куни эълон қилинган “Ўзбекистон Республикасида пиллачилик ва қоракўлчиликни янада ривожлантириш чора-тадбирлари тўғрисида”ги Фармони  эса бу борадаги  ишларни  янада ривожлантириш имкониятларини кенгайтирди.

Мен партия вилоят Кенгашига раҳбар этиб сайланганимдан аввалги йиллари  қишлоқ хўжалиги соҳасида фаолият олиб борганман. Албатта, Фармонда назарда тутилган  қоракўлчилик, пиллачилик тармоқларида ҳам бир қатор камчиликлар тўпланиб қолган эди. Энди давлатимиз раҳбари Фармони билан бундан буён  ҳудудларда қоракўлчилик кластерлари ташкил этилади. Пиллачилик ва қоракўлчиликни ривожлантириш  қўмитаси тузилади. Дарвоқе, Фармонда янгидан тузиладиган ушбу қўмитанинг мақсад ва вазифалари ҳам аниқ белгиланяпти. Шунга мувофиқ, Қўмита тут плантациялари ва яйловларнинг қатъий ҳисобини юритиб, озуқа базасини мустаҳкамлайди. Пилла ва қоракўл терисидан тайёр маҳсулот ишлаб чиқариш ва ташқи бозорларга сотишни йўлга қўяди. Шунингдек, Қўмита  томонидан пиллачилик ва қоракўлчилик билан шуғулланувчи тадбиркорлик субъектларини қўллаб-қувватлаш, Агрохизматлар марказлари орқали уларнинг билимларини оширишга ёрдам кўрсатилади.

Ҳужжатга асосан, яна бир хайрли ишга қўл уриляпти. 2021-2022 ўқув йилидан бошлаб Тошкент давлат аграр университети ва Самарқанд ветеринария  медицинаси институти филиалларида қоракўлчилик соҳасида кадрлар тайёрлаш юзасидан махсус йўналишлар очилади. Бундан ташқари, Самарқанд ветеринария ва медицина техникумида ҳамда Марғилон шаҳридаги 1-сон касб-ҳунар мактабида  майда шохли молларни кўпайтириш, ипакдан тайёр маҳсулотлар ишлаб чиқариш бўйича кадрлар тайёрланади.

Вилоятимизда пиллачилик, қоракўлчилик йилдан-йилга ривожланмоқда. Чорвадорларимиз ва “Зар тола” яратувчилари  иқтисодиётни  кўтариш, маҳсулот сифатини яхшилаш учун астойдил меҳнат қиляптилар. Пиллачиликда Касби, Қарши туманлари, қоракўлчиликда эса Миришкор, Нишон, Ғузор тумани чорвадорлари эришаётган ютуқлар айниқса салмоқли бўлаётир. Иш Президентимиз таъкидлаганларидек, илм-фанга таяниб  ташкил этилаётгани, соҳага кластер тизими жорий этилиб, чорва ва ипак қуртининг озуқа базасини йилдан-йилга кўпайтириб борилаётгани яхши самара бераётир.

Умуман олганда, партиямиз сайловолди дастурида ҳам қишлоқ хўжалиги соҳасида инновацияни кенг қўллаб, дунё талаби даражасида кўп маҳсулот етиштириш ғояси илгари сурилган. Шу туфайли ҳам Президентимизнинг  ушбу  Фармонида белгиланган устувор йўналишлар партиямизнинг мақсад ва вазифаларига ҳамоҳанг эканлиги билан ҳам аҳамиятлидир.

                                                                   Руиддин РАУПОВ,

                                             Ўзбекистон “Адолат” СДП  Қашқадарё вилоят

                                              Кенгаши раиси, халқ депутатлари вилоят Кенгаши

                                               депутати