Ёш депутатлар тажриба алмашди

Когон туманининг “Тараққиёт” маҳалла марказида Ўзбекистон “Адолат” СДПнинг 25 йиллиги муносабати билан партия Когон туман Кенгаши томонидан “Ёшларнинг интеллектуал салоҳиятини ошириш – давр талаби” шиори остида семинар-тренинг ташкил этилди. Унда партия вилоят ва туман Кенгаши ходимлари, депутатлар, туманнинг фаол ёшлари иштирок этишди.

Семинарни кириш сўзи билан очиб берган партия вилоят Кенгаши раиси ўринбосари Рауф Сувонов ёшларга қаратилаётган эътибор тўғрисида тўхталиб ўтар экан, сўзи аввалида мамлакат раҳбарининг Ўзбекистон Республикаси Олий Мажлисга йўллаган Мурожаатномасида ёшларнинг иқтидорини қўллаб-қувватлаш, уларнинг салоҳиятини ошириш борасида аниқ таклифларнинг келтириб ўтилганлиги ҳақида ҳам гапириб ўтди.

Семинарда Халқ депутатлари Когон туман Кенгишининг ёш депутати Шеҳроз Норов сўзга чиқиб, ўз тажрибаси билан ўртоқлашди. Жумладан, ёш депутатнинг бугунги фаолияти қандай бўлиши керак, халқ билан мулоқот қилишда нималарга эътибор қаратиши лозимлиги хусусида фикр билдирди.

Ҳар бир ёш авлод ўз олдига аниқ мақсад қўяр экан, албатта, ана шу мақсади йўлида интилиши даркор. Партия томонидан бу каби семинар-тренинглардан асосий мақсад ёшларни бирдамликка чақирган ҳолда уларнинг орзу-истакларини қўллаб-қувватлаш, бу борада кўмаклашишдан иборатдир. Депутат ҳам айни дамда ўзининг заргарлик ҳунари асосида тадбиркорлик фаолиятини кенгайтириш, ишлаб чиққан бизнес режасига таянган ҳолда  уюшмаган ёшлар билан ишлаш тизимини йўлга қўйиш, ташкил этиладиган кўргазмаларда фаол иштирок этиб, ўз тажрибасини бойитиб бораётганлиги ҳақида гапириб ўтди.

-Юртимизда ёшларга жуда катта эътибор қаратилмоқда. Биз эса ҳар бир имкониятдан унумли фойдалансак, албатта мақсадимизга эришамиз. Бугунги ташкил этилган семинарда ёш депутатнинг қандай ўз мақсадларига эришиб келаётганлиги барчани қизиқтирган бўлса, у томонидан берилган таклифлар эса йиғилганларга ғайрат берди, - дейди туман “Ёш адолатчилар” қаноти фаоли Оқила Камолова.

Тадбир сўнгида партиянинг фаол ёшларига эсдалик совғалари ва ташаккурномалари берилди.

Моҳигул АБДУЛЛАЕВА,

Ўзбекистон “Адолат” СДП

Бухоро вилоят Кенгаши матбуот котиби