Бирдамликда зафар қучамиз

29.03.2020 09:03:50

Бугун бутун дунё эл-элатларининг бошига тушиб турган коронавирус ташвиши барча халқларни миллатидан, диний эътиқод ва сиёсий қарашларидан қатъий назар бирлаштирмоқда.

Мамлакатимизда давлатимиз раҳбари бошчилигида коронавирусга қарши олиб борилаётган кураш, бунда шифокорларимизнинг, ҳуқуқни муҳофаза қилувчи идоралар вакилларининг, ҳарбий хизматчиларимизнинг фидокорона меҳнатлари, шунингдек, давлат органлари, жамоат ташкилотлари ва кенг жамоатчилик иштирокида, айниқса, турли миллат ва элат вакиллари бирдамлигида бажарилаётган тушунтириш-тарғибот ишлари таҳсинга лойиқ.  Биз, албатта, улардан миннатдормиз!

Таъкидлаш жоизки, бу ғамхўрликни, бирдамликни ҳис қилишимиз, хулоса чиқаришимиз ва ўрнатилган тартиб-интизомга қатъий риоя қилишимиз ғалаба кунларини янада  яқинлаштиради.  Шу ўринда, бугун кўзга ташланиб қолаётган айрим ватандошларимиздаги ғўрлик, йўғонбўйинлик, ўзбошимчалик, маданиятсизлик халқимиз аҳволини янада  мушкуллаштиришини унутмаслигимиз лозим. 

Яна шуни унутмаслигимиз жоизки, бу касалликнинг энг хавфли жиҳати тез юқувчанлигидадир ва алал оқибат ушбу  вирусни юқтирган инсоннинг нафақат ўзи, оиласи (бутун бир сулоласи, авлоди) ҳалокат жарига бориб қолиши билан қўрқинчлидир.

Биз, ана шу хавфни ҳис қилган ҳолда Республика Махсус Комиссияси ва унинг қарорларига бирдамлик билан итоат этишимиз шарт. Бу чекловларнинг барчаси сиз-у бизнинг ҳаётимизни сақлаб қолиш учун қилинаётган саъй-ҳаракатлардир. Қўлларимизни тез-тез совунлаб ювиш,  албатта, тиббий ниқоб тақиш, суҳбатда икки метрлик масофани сақлаш, тўпланмаслик, уйда қолиш каби чақириқларга қатъий риоя қилсак, карантин даврида кўчага чиқмасак бу курашга ўзимизнинг муносиб ҳиссамизни қўшган бўламиз.

Биз, жаҳон олимлари эътироф этган, Ер юзига таниқли минглаб буюк алломаларнинг авлодлари эканлигимизни унутмаган ҳолда, бошқа халқларга ўрнак бўлишимиз даркор. 

Айниқса, тиббиёт илмининг султони Абу Али Ибн Сино ватанида бу каби касалликларга ўрин йўқлигини амалий ҳаракатларимиз билан исботлашимиз ва бунинг учун бунданда жипсроқ бирлашиб, бу борадаги барча эзгу ишларни қўллаб-қувватлашимиз, юксак тиббий-санитария маданиятимизни кўрсатишимиз зарур.

Сиз-у  биз, Яратганнинг инояти билан бирдамликда ва қалбан  бирликда юқувчан вирус билан курашамиз ва, албатта, зафар қучамиз! Зеро, ҳар бир инсон яшашга, яшаганда ҳам соғлом яшашга ҳақлидир!

 

Абдукамол РАХМОНОВ,

Ўзбекистон “Адолат” СДП

Сиёсий Кенгаши раиси ўринбосари

Улашинг!

Фикрингизни қолдиринг

Илтимос жавобингизни киритинг

+