Ойдин Абдуллаева: Масалага ижобий ечим топиш мақсадга мувофиқ

“Илҳом” театри ўзининг кўп йиллик фаолияти давомида юртимиз санъати, маданиятининг ривожи ва тараққий этишига монанд янги тенденцияларнинг ҳаётга кириб келишига баракали ҳисса қўшган. Бинобарин, театр ҳар қандай стереотиплардан холи, доимий равишда изланишда бўлган ижодий жамоа эканлигини эътироф этмоқ лозим.

Унинг “Shodlik Palace” меҳмонхонаси мулкдорлари билан юзага келган муаммоли вазият бўйича эса қуйидаги фикр-мулоҳазаларни билдириш мумкин.

Меҳмонхона раҳбарияти реконструкция ва таъмирлаш ишларини ниҳоясига етказганидан кейин “Илҳом” театри ўзининг аввалги жойига кўчиб келишига кафолат бериши ҳамда ушбу театрнинг меҳмонхона ҳудудида ўз фаолиятини давом эттириши масаласига вазминлик билан ёндошиш иккала томонга ҳам катта наф келтиради.

Бундан ташқари, “Илҳом” театри ҳамда “Shodlik Palace” меҳмонхонаси мутасаддиларининг кўп йиллик дўстона ҳамкорлигини инобатга олиб, мавжуд масалага ўзаро келишилган ҳолда ижобий ечим топиш мақсадга мувофиқ бўлади, деб ўйлайман.

Ойдин АБДУЛЛАЕВА,

Олий Мажлис Қонунчилик палатаси депутати