Янги сайловлар, янги парламент, янги Ўзбекистон!

Халқнинг ишончи, гарданимизга юкланган буюк масъулият ҳисси биз депутатларни мана шу ҳафтада ўз хизмат вазифамизга киришишимизда алоҳида кўтаринкилик бағишлади.

Олий Мажлис Қонунчилик палатасининг биринчи йиғилишида давлатимиз Президентининг сўзлаган нутқи депутатлар учун асл маънодаги фаолият дастури бўлди. Президент депутатларга юзланар экан, бугунги кунда аҳолининг турмуш даражасини кўтариш, давлат имиджини яхшилаш учун пухта ва мустаҳкам қонунлар кераклигини таъкидлади. Депутатлар томонидан ёзилган ва қабул қилинган қонунлар ўзининг самарасини бериши, халқ корига яраши кераклигини уқтирди.

Бугунги кунда юртимизга инвестиция хусусида жуда кучли қонун зарурлиги тўғрисидаги масала кўтарилди. Негаки, юртимизга хориждан сармоя жалб этиш, чет эллик инвесторларнинг юртимизга бўлган қизиқишини оширишда айнан қонуний нормалар зарур. Ўзбекистон билан боғлиқ ишонч ва орзу-умиднинг қонуний кафолатланганини тушунган инвестор юртимизга ҳеч қандай ҳадиксирамай келади ва биз билан ҳамкорлик қилади.

Пухта ва мукаммал қонун яратилишини кутиб турган яна кўплаб соҳалар бор. Бунинг учун депутатлардан кўп ўқиш, тажриба орттириш, ўрганиш ва тафаккур доирасини кенгайтириш талаб этилиши Президент томонидан қайта-қайта таъкидланди. Муайян соҳа вазири билан мулоқотга киришганда, аввалига ушбу соҳани пухта ўрганиб, сўнгра вазирга савол бериш, мавжуд муаммонинг ечимини топишда катта аҳамиятга эга экани айтилди.

Президент депутатларни фаолликка чақирар экан, машҳур давлат арбоби Теодор Рузвельтнинг: “Ҳеч қандай иш қилмайдиган одамгина хато қилмайди”, - деган фикрини келтириб ўтди. Албатта, бугунги кунда парламентга келган депутатларнинг ҳар бири ўз касбу ҳунарида улкан поғоналарга эришган юқори салоҳиятли мутахассислардир. Уларнинг ҳар бири ўз соҳасига тегишли бўлган муаммоларни яхши тушунади. Керак бўлса, ушбу муаммоларни ечишнинг ечимларини ҳам англайди. Шундай экан, депутатлардан ҳар бири парламентга келиб иш бошлар экан, қалбига тугиб қўйган ва уддасидан чиқишга аҳд қилган долзарб масалалари бор. Мана шу масалаларни ечишда тажрибали депутатлардан маслаҳатлар олиш, ўқиб ўрганиш жуда муҳимдир.

Президент Олий Мажлис Қонунчилик палатасининг депутатларига юзланар экан, “Депутатнинг қалби уйғоқ бўлса, парламент ҳам, ҳукумат ҳам, жамият ҳам уйғоқ бўлади!” – деган жўшқин фикрни айтди. Зеро, шахсий намуна кўрсатиш орқали кучли фаолият олиб бориш бугунги кунимиз учун жуда муҳимдир.

Бугунги кунда қонун ҳужжатлари жуда кўп эканлиги боис уларни пухта ўрганиш халқимиз ва мутасаддилар учун маълум қийинчиликларни туғдиради. Буни бартараф этиш мақсадида ҳар бир соҳа учун ягона кодекс яратиш ташаббуси Президент томонидан илгари сурилди. Бинобарин, ушбу кодексда барча меъёрлар мавжуд бўлсинки, ундан бошқа ҳужжатни варақлашга эҳтиёж бўлмасин. Ҳақиқатан ҳам, юртимизда бундай тажриба қўлланилган. Сайлов Кодекси ҳам шулар жумласидандир.

Шу билан бирга, ҳар бир яратилган қонуннинг кейинги тақдирини ўрганиш, унинг ҳақиқатан ҳам самара келтираётгани хусусида танқидий-таҳлилий иш олиб бориш зарур экани таъкидланди. Зеро, Парламент назорати ҳар бир соҳага йўналтирилган бўлиши ва ўзининг таъсирчанлигини янада орттириб бориши ўта муҳим аҳамиятга эга экани уқтирилди.

Президент Олий Мажлис Қонунчилик палатаси ва Сенатининг қўшма йиғилишида Парламент олдида турган долзарб масалаларни ўзгача ракурсда ёритди.

Иқтисодиётни барқарорлаштириш масаласини кўтарар экан, Президент ҳар бир оиладаги жон бошига тўғри келадиган даромад улушини ошириш, оилада дастурхоннинг тўла-тўкис бўлиши ушбу масаланинг асосий кўрсаткичи бўлиши кераклигини айтди. Зеро, ҳар бир ислоҳот фақатгина халқ фаровонлиги ва жамият тараққиёти учун хизмат қилиши кераклиги таъкидланди.

Президент депутатларни аҳиллик ва якдилликка чақирди. Иш чоғида муросасиз баҳс-мунозара ва тортишувлар орқали ишлаб, ишдан ташқари вақтда бир-биримизга нисбатан ҳурмат-эҳтиром билдиришимиз кераклиги, иш жараёнида бирдам бўлиб ишлашимиз кераклигини айтди. Йигирма йиллик қўрқув ичида яшаганимиз, бугун эса том маънода янги ҳаёт бошлаётганимизда қўрқув ҳиссини ҳиёнат билан тенглаштирди давлатимиз раҳбари. Бугунги кунда ҳар қандай ҳадикни йиғиштириб, дадил қадамлар билан ҳаракат қилиш жуда муҳимдир. Зеро, халқимиз биздан улкан натижаларни кутмоқда. Халқни рози қилиш, ҳар бир соҳада фаровонликка эришиш, биздан кейинги авлодларга обод юртимизни мерос қилиб қолдириш ҳар биримиз учун олий мақсад бўлиб қолиши керак!

Ойдин АБДУЛЛАЕВА,

Олий Мажлис Қонунчилик палатаси депутати,

“Адолат” СДП фракцияси аъзоси