Жамоатчилик палатаси – халқ фикрининг кўзгуси

Бугунги кунда аҳоли мурожаатлари, шикоятлари билан ишлаш бўйича аниқ ва самарали тизим яратилган. Аммо партия депутатлари, фаолларининг жойларда электорат вакиллари билан учрашувларида аҳоли ташаббуси, таклифларини қўллаб-қувватловчи, уларни керакли органларга етказувчи давлат органлари билан фуқароларни бир-бирига боғловчи “ришта”ларнинг етарли эмаслиги маълум бўлди.

Президентимизнинг жорий йилдаги Олий Мажлисга мурожаатномасида бу масалага алоҳида урғу бериб “Нодавлат нотижорат ташкилотлари ва фуқаролик жамиятининг бошқа институтлари бугунги кунда аҳолини ўйлантираётган муаммоларга давлат идоралари эътиборини қаратиб, ўзларининг асосланган таклифларини бериб боришлари мақсадга мувофиқ бўлади” – деб кўрсатиб кетдилар. Ва сўзларининг исботи сифатида жамоатчилик назоратини янада кучайтириш, давлат ва жамият ўртасида ўзаро яқин ҳамкорлик ўрнатиш мақсадида Ўзбекистон Республикаси Жамоатчилик палатасини ташкил этишни таклиф қилдилар.

Жорий йилнинг16 апрель куни имзоланган “Ўзбекистон Республикаси Президенти ҳузуридаги Жамоатчилик палатасини ташкил этиш тўғрисида”ги фармон билан Президенти ҳузуридаги Жамоатчилик палатаси ва унинг жойлардаги ҳудудий Жамоатчилик палаталари ташкил этилди.

Мазкур палата орқали ҳар бир фуқаро мамлакатимиздаги ижтимоий – сиёсий жараёнларнинг ҳар бирида қатнашиш ва ўз фикрини айта олиш ҳуқуқига эга бўлади.

Аҳамиятлиси, Жамоатчилик палатаси мақсади ва вазифаларига кўра Олий Мажлис палаталари ва жойлардаги маҳаллий Кенгашларнинг энг яқин ҳамкорига айланмоқда. Буни биз Олий Мажлис ва ҳудудий кенгашларда Жамоатчилик палатаси ва унинг минтақавий органлари томонидан фуқароларимиз учун долзарб бўлган масалалар юзасидан ўтказилган ўрганиш ва таҳлил натижаларини ҳар чоракда муҳокамадан ўтказилишида, уларнинг йиғилишларида, “Ҳукумат соати”да палата аъзоларининг иштирок этиши, халқимиз ҳаётига оид муҳим масалаларни ҳамкорликда кўриб чиқиш каби жараёнларда кўришимиз мумкин.

Шу билан бирга Олий Мажлис палаталари қошида ташкил этилган “Mening fikrim” веб-портали ҳам Жамоатчилик палатаси тасарруфига ўтказилмоқда. Бу Палатанинг халқ билан мулоқатнинг замонавий шаклларидан самарали фойдаланиш имкониятини берса, иккинчидан, Олий Мажлиснинг қайсидир бўлинмаси шуғулланган портал билан алоҳида орган шуғулланиши унинг натижадорлигини таъминлашга хизмат қилади.

Фармон билан аҳоли фикрини тизимли ўрганиб бориш, жойларда ва соҳаларда халқимизни, фуқаролик жамияти институтларини ҳамда жамоатчиликни ташвишлантираётган долзарб масалаларни муҳокама қилиш, шунингдек, уларнинг ечими бўйича Ўзбекистон Республикаси Президенти, Олий Мажлис палаталарига ва ҳукуматга тегишли норматив-ҳуқуқий ҳужжатларни ишлаб чиқиш бўйича таклифлар киритиб бориши белгиланмоқда. Бу эса биз олдимизга қўйган кучли фуқаролик жамиятни қуриш борасидаги мақсадимизга эришишда муҳим омил бўлиши шубҳасиз.

Шу пайтгача парламентда Президент олдида фуқаролик жамияти институтларининг позициясини билдирадиган ягона ташкилот йўқ эди. Ташкил этилаётган Жамоатчилик палатаси халқимиз дилидаги масала ва муаммоларни Давлат раҳбари ва парламентга тўғридан-тўғри олиб чиқишда бугун вазифасини бажарувчи идора бўлмоғи лозим.

Бу борада унга зарур ҳуқук ва функциялар берилмоқда.Бир сўз билан айтганда, ташкил этилган Жамоатчилик палатаси халқимизнинг овозига айланмоқда. У овознинг қанчалик жарангдор бўлиши ва тараққиёт учун хизмат қилиши ўзимизга, фуқароларимизга боғлиқдир.

Дилмурод ИСМОИЛОВ,

Олий Мажлис Қонунчилик палатасидаги

“Адолат” СДП фракцияси аъзоси