Axloqsizlikni madaniyat deb bilmaylik...

Shu kunlarda ijtimoiy tarmoqlar, xususan, “OPER.UZ” telegram kanalida eʼlon qilingan “Hokimlik tashabbusi bilan “tungi klub” ochilibdi” sarlavhali videolavha muhokamalar markazida boʻlmoqda.

Unda, Namangan viloyatining Kosonsoy tumanida yoshlar kechgi vaqtda boshqa tumanlarga chiqib ketishining oldini olish maqsadida “tungi klub” (diskoteka) faoliyati yoʻlga qoʻyilgani, hokimlik mazkur obyektni “diskoteka” emas, balki “tungi musiqiy koʻngilochar markaz” sifatida taʼriflagani qayd etilgan.

Hozirgi vaqtda axloqsizlikni madaniyat deb bilish bilan bogʻliq holatlar Yurtimiz taraqqiyotiga, insonlar hayoti, oila muqaddasligi va yoshlar tarbiyasiga katta xavf solishi mumkin boʻlgan jarayondir hamda bu kabi holatlarning jamiyatimizda uchrab turishi achinarli hol.

Koʻpchilik yoshlar bugungi kunda odob-axloqni, kiyinish va muomala madaniyatini asosan ommaviy madaniyat orqali olishmoqda. Turli yoʻllar bilan, har xil “ezgu” niqoblar ostida “ommaviy madaniyat” mamlakatimizga ham tahdid solayotgani sir emas.

Misol uchun: urf boʻlayotgan yangi yoʻnalishdagi qoʻshiqchilik (masalan, “Oʻrtogʻim mazza qilib yasha” nomli, “Kipriging tiriknikimi?” qoʻshiqlari hamda “Labing oʻzingnikimi?”), turli musiqiy shoular (diskoteka), koʻrsatuvlar yoshlarimiz tarbiyasiga salbiy taʼsir koʻrsatayotganligini aytishimiz lozim. Bu esa “Ommaviy madaniyat”ning keng quloch ochishiga zamin hozirlaydi.

Qayd etish joizki, “Ommaviy madaniyat” namoyondalari jamiyat aʼzolari didini belgilovchi maʼlum bir andozalarni shakllantiryaptiki, bir qarashda bu zararsiz, hatto yoqimli boʻlib tuyulyapti. Bu – aynan yangi jamiyat bunyodkorlari boʻlmish yoshlarni oʻz domiga tortibgina qolmasdan, ularni mazkur madaniyat targʻibotchilariga aylantirib qoʻyayotganligi bilan xatarlidir.

Butun dunyoda oila instituti inqirozining salbiy koʻrinishlari, oilaviy ajrimlarning ortishi, yoshlar tarbiyasiga eʼtiborsizlik holatlari avj olmoqda. Mamlakatimizda bunday salbiy illatlarning oldini olishda oʻsib kelayotgan yosh avlodlarni milliy qadriyatlar ruhida tarbiyalashimiz lozim. Buning uchun jamiyatda va oilada sogʻlom hamda barqaror ijtimoiy-maʼnaviy muhitni shakllantirish lozim boʻladi.

Bu borada, yosh avlod tarbiyasi va “ommaviy madaniyat”ning taʼsiri toʻgʻrisida Prezident Sh.Mirziyoyev “Biz jamiyatimizda har qanday radikallashuvga, yoshlarimiz ongini buzgʻunchi yod gʻoyalar bilan zaharlashga, ... farzandlarimizni milliy va umumbashariy qadriyatlar ruhida tarbiyalash boʻyicha oila, mahalla va taʼlim maskanlarida ish olib borishimiz zarur” deb taʼkidlaganlar.

Tabiiyki, Namangan viloyatining Kosonsoy tumanidagi yuz bergan ushbu holat partiya faollarini ham befarq qoldirmadi.

Shu bois, Oʻzbekiston “Adolat” sotsial-demokratik partiyasi Saylovoldi gʻoya va maqsadlarida belgilangan vazifalaridan hamda partiya elektorati manfaatlaridan kelib chiqib, milliy qadriyatlarimiz hamda yoshlar tarbiyasiga katta xavf soluvchi ommaviy tadbirlarni tashkil etishni qoʻllab-quvvatlamaydi. Aksincha, yoshlarning huquq va erkinliklari, qonuniy manfaatlarini himoya qilgan holda ularni milliy va umuminsoniy qadriyatlarimizga hurmat ruhida tarbiyalash, Vatanga muhabbat va uning taqdiriga daxldorlik hissi bilan yashashga undaydigan tadbirlar uchun yoshlarni birlashtirishni muhim deb hisoblaydi.

Gulniso Saidova,
Ayollar va yoshlarning siyosiy faolligini
oshirish boshqarmasi boshligʻi.