Muammo bilan yuzma-yuz

Davlatimiz rahbari tomonidan taʼlim tizimiga alohida eʼti­bor qaratilishi bu borada jamoatchilik zimmasidagi masʼuliyatni ham oshirmoqda. Chunki maktab — kelajak ostonasi. Farzandlarimizning barkamol insonlar bo‘lib kamolga yetishi ayni ilm maskanlari bilan bog‘liq.

Yuqoridagilardan kelib chiqib, “Adolat” SDP Izboskan tuman kengashi faollari yangi o‘quv yili boshidan maktablarda yaratilgan sharoitlarni o‘rganishga kirishdi. Jamoatchilik nazorati tartibidagi tadbirlar taʼlim muassasalaridagi muammolar yechimiga yo‘l ochadi. “Taraqqiyot” MFY hududida joylashgan 32-umumtaʼlim maktabida bo‘lgan partiyadoshlarimiz yangi o‘quv yiliga qanday tayyorgarlik ko‘rilgani, o‘quvchilarning darsliklar bilan taʼminlanganlik darajasi va kuz-qish mavsumiga tayyorgarlik ishlariga eʼti­bor qaratdi. Maktabda olib borilayotgan ishlar ko‘ngildagidek. Yangi o‘quv yilini jamoa yangi maqsadlar bilan bosh­ladi. Buni sinf xonalaridagi qaynoq hayot ham ko‘rsatib turibdi.

Bizni faqat maktabdagi bir muammo tashvishga soldi. O‘tgan yilning sovuq kunlarida 5 ta truba yorilib ketgan. Oradan shuncha vaqt o‘tdi. Biroq mutasaddilar tomonidan haligacha biron chora ko‘rilmagan. Vaqt esa kutib turmaydi. Hademay yana sovuq kunlar boshlanadi. Ko‘mir zahirasi haqida ham hozirdan bosh qotirish lozim.

Muammoning katta, kichigi bo‘lmaydi. Shunday ekan masʼullar masalaga jiddiy eʼtibor qaratishi zarur.

Dilfuza Ahmedova,

“Adolat” SDP Izboskan tuman kengashi raisi