O‘zbekiston 2030 strategiyasi – oqilona rejalashtirishning zamonaviy dasturi

Hozirgi vaqtda Yangi O‘zbekistonning uzoq muddatli kelajagini shakllantirish kun tartibining asosiy masalalaridan biri bo‘lmoqda.

2023 yil 30 aprelda o‘tkazilgan referendumda umumxalq ovoz berish yo‘li orqali O‘zbekiston Respublikasining yangi tahrirdagi Konstitutsiyasi qabul qilinganligi Yangi O‘zbekistonni barpo etishning konstitutsiyaviy asoslarini mustahkamlashga xizmat qildi.

Shuningdek, dunyoda kundan-kunga yangi-yangi sinovlar, xavf-xatar va tahdidlar paydo bo‘layotgani, bugungi ziddiyatli jarayonlar, iqtisodiy qarama-qarshiliklar rivojlangan davlatlar aholisini ham jiddiy o‘ylantirib qo‘ymoqda va bularning barchasi bizga taʼsir ko‘rsatmasdan qolmaydi. Davlatimiz rahbarining farmoni bilan tasdiqlangan, Yangi O‘zbekistonning zamonaviy iqtisodiy tizimlari, ixcham va samarali davlat boshqaruvining joriy etilishi o‘z navbatida, aholimizga farovon turmush darajasini yaratib berishning zamonaviy mexanizmlarini o‘z ichiga olgan “O‘zbekiston – 2030” strategiyasi bu mamlakatimizning kelgusi yetti yilligiga bag‘ishlangan oqilona rejalashtirishning zamonaviy asosi, desak mubolag‘a bo‘lmaydi.

Strategiyada o‘zgarishlarga erishishga qaratilgan bir qator yo‘nalishlariga asosiy eʼtibor qaratilgan. Masalan, barqaror iqtisodiy o‘sish orqali daromadi o‘rtachadan yuqori bo‘lgan davlatlar qatoridan o‘rin olish, aholi talablariga va xalqaro standartlarga to‘liq javob beradigan taʼlim, tibbiyot va ijtimoiy himoya tizimini tashkil etish, qulay ekologik sharoitlarni yaratish, davlat xizmatlari sifatini oshirish, ham mamlakat ichida, ham chet elda davlat suverenitetini va xavfsizligini kafolatlash asosiy g‘oyalar sifatida aks etmoqda.

O‘z o‘rnida qayd etish joizki, xotin-qizlarni qo‘llab-quvvatlash tizimini kuchaytirish, ularning huquq va qonuniy manfaatlarini taʼminlash, ijtimoiy, iqtisodiy, siyosiy faolligini oshirish va gender tenglikni taʼminlash borasidagi muhim ustuvor yo‘nalishlarning belgilanishi, Strategik hujjatda har bir qatlam vakilining huquq va manfaatlari inobatga olinganligi hamda har bir fuqaroga teng imkoniyatlar yaratilayotganidan darak beradi.

Bunda, albatta, Gender tenglikni taʼminlash siyosatini davom ettirish, xotin-qizlarning ijtimoiy-siyosiy faolligini oshirish orqali boshqaruv lavozimlaridagi xotin-qizlar ulushini 30 foizga oshirish, jamiyatda xotin-qizlarga tazyiq va zo‘ravonlikka nisbatan murosasizlik muhitini yaratish, xotin-qizlarning huquqlari va qonuniy manfaatlarini taʼminlash hamda “Ayollar daftari” bilan manzilli ishlashning shaffof mexanizmini yaratish, mazkur ishlar bo‘yicha jamoatchilik nazoratini o‘rnatish kabi ilg‘or g‘oyalar ilgari surilgan.

Shu bilan birga, mehnatga layoqatli aholini, shu jumladan yoshlar va nogironligi bo‘lgan shaxslarni barqaror va samarali bandligini taʼminlash orqali ishsizlik darajasini 7 foizgacha tushirish, homiladorlik va tug‘ish, vaqtincha mehnatga qobiliyatsizlik, ish beruvchi yuridik shaxs tugatilganda va tugatilayotgan korxonaning to‘lovlar uchun mablag‘lari mavjud bo‘lmagan hollarda ishdan bo‘shatish nafaqalari, ishlab chiqarishdagi baxtsiz hodisalar oqibatidagi sug‘urta to‘lovlarini kafolatlangan ijtimoiy sug‘urta tizimi orqali amalga oshirishni tashkil etish kabi ustuvor vazifalarning belgilanishi aholi bandligini taʼminlash sohasida aholini daromadli mehnat bilan band qilish, ijtimoiy sug‘urta tizimini takomillashtirishga xizmat qiladi.

Shuningdek, Strategiyada yoshlarni qo‘llab-quvvatlashning zamonaviy mexanizmlariga ham alohida eʼtibor qaratilgan. Jumladan, yoshlarni zamonaviy kasblar va chet tillariga o‘qitish tizimini yaratish, bunda, Yoshlarning zamonaviy kasblar bilan mashg‘ul bo‘lishini taʼminlash uchun har bir viloyatda 1 tadan “Kreativ park”lar faoliyatini tashkil etish, ularga yiliga kamida 40 ming nafar yoshlarni jalb qilish va maktab bitiruvchilari kamida 2 ta xorijiy til va 1 ta kasb egallashini taʼminlash nazarda tutilgan.

Yoshlarning intellektual salohiyatini oshirish, ularning ilmiy faoliyatini rag‘batlantirish maqsadida ilmiy va innovatsion faoliyat, intellektual o‘yinlar hamda chet tillarini o‘rganishga jalb etish orqali kamida 2 million nafar yoshlarning iqtidorini rivojlantirish va har yili 500 nafar isteʼdodli yoshlarni xorijning nufuzli oliygohlariga o‘qishga yuborish asosiy vazifalardan biri sifatida belgilangan.

Muxtasar aytganda, “O‘zbekiston – 2030” strategiyasi aniq maqsadli ko‘rsatkichlar hamda puxta o‘ylangan rejalar asosida ishlab chiqilgan va ushbu strategiya fuqarolarimiz ravnaqi uchun xizmat qiladi.

“Adolat” SDP Markaziy apparati

Ayollar va yoshlarning siyosiy faolligini oshirish boshqarmasi boshlig‘i Gulniso Saidova