Turkiy dunyo kreativ yoshlari markazini ochish taklif etildi

Turkiy xalqlar birdamligi, ularning buyuk o‘tmishi va boy madaniyati, azaliy qadriyatlarini ifoda etuvchi Turkiy davlatlar tashkiloti dastlab, 2009-yilning 3-oktabr sanasida Turkiy tilli davlatlar hamkorlik Kengashini tuzish to‘g‘risidagi “Naxchivan shartnomasi”ga muvofiq tashkil etilgan. Uning asosiy maqsadi – mamlakatlar o‘rtasidagi har tomonlama hamkorlikni rivojlantirish etib belgilangan. O‘zbekiston Turkiy tilli davlatlar Kengashiga rasman 2019-yilning sentabr oyida a’zo bo‘lgan.

Bugungi kunda tashkilot faoliyati 22 ta moddadan iborat “Naxchivan shartnomasi”ga muvofiq faoliyat ko‘rsatib kelmoqda. Jumladan, “Naxchivan shartnomasi”ning 2-moddasida tomonlar o‘rtasida o‘zaro ishonch, do‘stlik va yaxshi qo‘shnichilik munosabatlarini mustahkamlash, mintaqada va uning tashqarisida tinchlikni ta’minlash va xavfsizlikni mustahkamlash, tashqi siyosat masalalari bo‘yicha umumiy pozitsiyalarni qabul qilish, umumiy maqsadlarga taalluqli barcha sohalarda samarali mintaqaviy va ikki tomonlama hamkorlikni rivojlantirish hamda a’zo davlatlar o‘rtasida savdo va investitsiyalar uchun qulay sharoitlar yaratish kabi maqsadlar a’zo davlatlar tomonidan to‘laqonli amalga oshirib kelinmoqda.

Xususan, O‘zbekiston tomonidan ham tashkilot faoliyatini yanada jonlantirish a’zo mamlakatlar o‘rtasidagi o‘zaro hamkorlik aloqalarini yanada jonlantirishga qartilgan qator tashabbuslar amalga oshirib kelinmoqda. Tashkilotga O‘zbekiston raisligi davrida turkiy davlatlar o‘rtasidagi hamkorlikni mustahkamlashga qaratilgan yuzdan ortiq turli tadbirlar o‘tkazildi, muhim tashabbuslar ilgari surildi, yangi tuzilmalar tashkil etildi, bir qator nufuzli global va mintaqaviy tuzilmalar bilan yaqin sheriklik aloqalari o‘rnatildi. Ayni kunlarda o‘tgan yili Samarqand sammitida imzolangan muhim hujjatlar izchil bajarilmoqda.

Prezidentimiz yaqinda Ostona shahrida bo‘lib o‘tgan Turkiy davlatlar tashkiloti davlat rahbarlari kengashi yig‘ilishida ham tashkilotga a’zo davlatlar o‘rtasidagi ko‘p tomonlama va uzoq muddatli aloqalarni yanada kengaytirishga qaratilgan qator taklif va tashabbuslarni ilgari surdi.

Jumladan, Prezidentimiz sanoat kooperatsiyasini kuchaytirish va yirik qo‘shma investitsiya loyihalarini amalga oshirish maqsadida Turkiy taraqqiyot bankini tashkil etish ishlarini faollashtirish muhimligini qayd etib, ushbu moliya muassasasini Toshkent shahrida joylashtirishni taklif qildi. Mazkur tashabbusning amalga oshirilishi esa, “Naxchivan shartnomasi”da belgilanganidek, a’zo davlatlar o‘rtasida savdo va investitsiyalar uchun qulay sharoitlar yaratish imkonini beradi.

Shuningdek, Ostona muloqoti davomida davlatimiz rahbari global logistika zanjirlari va transport yo‘laklarini rivojlantirish va diversifikatsiya qilish, yagona tranzit tarmog‘ini shakllantirish, O‘rta koridor salohiyatini kengaytirish, qo‘shimcha ko‘p tarmoqli yo‘nalishlarni, jumladan, Xitoy, Janubiy Osiyo va Yevropa bozorlariga mamlakatlarimiz orqali o‘tadigan yo‘laklarni rivojlantirish hamda transport xizmatlarini raqamlashtirish chora-tadbirlarini qo‘llab-quvvatladi. Tashkilotning Temir yo‘l idoralari kengashini ta’sis etish va bu tuzilmaning direksiyasini O‘zbekistonda joylashtirishni taklif etdi.

Shu bilan birga, Prezidentimiz ijodiy fikrlaydigan, iste’dodli va shijoatli yoshlar istiqbolda turkiy dunyoning yangi Renessansini barpo etuvchi kuch ekanligini ta’kidlab, yangilikka intilib yashaydigan, tashabbuskor o‘g‘il-qizlarni rag‘batlantirish uchun O‘zbekistonda Turkiy dunyo kreativ yoshlari markazini ochishni taklif qildi.

Xulosa qilib aytganda, Turkiy davlatlar tashkilotiga a’zo mamlakatlar o‘rtasida o‘tkazilayotgan bu kabi strategik muloqot va uchrashuvlar bugun dunyoda ro‘y berayotgan geosiyosiy noaniqlik sharoitida o‘zining ijobiy natijasini berishi shubhasizdir.

Oltinoy MAMIROVA,
Oliy Majlis Qonunchilik palatasi deputati