Yoshlar yetakchisi yigit-qizlarning chin do‘stiga aylana oldimi?

Bugungi kunda mamlakatimiz aholisining 60 foizdan ziyodini yoshlar tashkil etadi. Ularni kasb-hunarga yo‘naltirish, bo‘sh vaqtlarini mazmunli tashkil qilish, muammolarini o‘rganish va hal etish, iste’dodlarini ro‘yobga chiqarish aslo kechiktirib bo‘lmaydigan vazifalardan biri sanaladi. Zero, yosh avlodning kamoloti, qiziqishiga befarq qarash ertangi kunimiz, kelajagimizga loqaydlik bilan barobardir.

Keyingi yillarda yurtimizda yoshlarni davlat tomonidan har tomonlama qo‘llab-quvvatlash va rag‘batlantirish borasida tizimli islohotlar amalga oshirilyapti. Prezidentimizning 2022 yil 19 yanvardagi tegishli qaroriga asosan, maktablardagi yoshlar yetakchilari shtat birliklari qisqartirilib, uning o‘rniga respublikadagi har bir mahallada yoshlar yetakchisi lavozimi joriy etildi.

Xo‘sh, yoshlar yetakchisi lavozimi nima uchun joriy qilindi? Bugun ushbu tizim qanday natija beryapti? Ular yigit-qizlarimizning chin do‘stiga aylana oldimi?

Qayd etish joiz, yoshlar yetakchilari lavozimining tatbiq etilishi, eng avvalo, tengdosh — tengdoshga tamoyili asosida yuzaga keladigan masalalarni tizimli hal qilishda yoshlar ishtirokini yanada kuchaytirdi. O‘z navbatida, mahalla tizimi xodimlarini o‘z xizmat lavozimiga kirmaydigan topshiriqlar, ortiqcha yuklamalardan xalos qildi.

Bugun yoshlarning qiziqishlarini, ularni o‘ylantirayotgan masalalarni hammadan ham ko‘proq yoshlar yetakchisi yaxshi biladi. Hozir qaysi mahallada ish yaxshi tashkil etilgan bo‘lsa, o‘sha hududda noxush holatlar kam bo‘layotgani, o‘sha hudud farovon, yoshlari esa baxtliroq yashayotganini barchamiz ko‘rib turibmiz.

Hozirgi kunda ularni qo‘llab-quvvatlash maqsadida har chorakda eng ilg‘or 100 nafar yetakchi bir oylik maoshga teng pul mukofoti hamda “Yangi O‘zbekiston islohotchisi” ko‘krak nishoni bilan taqdirlanmoqda. Eng muhimi, yaxshi natija ko‘rsatayotgan yetakchilar davlat e’tiboridan chetda emas.

Yoshlar yetakchilari mahalladagi yoshlarni rozi, og‘irini yengil qilish, ularga munosib turmush sharoitini yaratishdek muhim vazifalarni bajarmoqda. O‘tgan davrda ularning bevosita ko‘magi bilan ko‘plab yoshlarimiz imtiyozli kreditlar olib, o‘z tadbirkorlik faoliyatlarini yo‘lga qo‘ydi. Masalan, Samarqand viloyati, Nurobod tumani “Sazag‘an” mahallasida yashovchi Furqat Karimov o‘z biznesini yo‘lga qo‘yish uchun 300 mln. so‘m imtiyozli kredit olib mebel ishlab chiqarish faoliyatini boshladi. Ayni vaqtda u 8 nafar mahalla yoshlarini doimiy bandligini ta’minlash barobarida oylik aylanma mablag‘ hajmini 100 mln. so‘mga yetkazgan.

Yoshlarni qishloq xo‘jaligida band qilish uchun 254,6 ming nafar yoshlarga 66,3 ming gektar ekin maydoni ajratildi. Xususan, Xorazm viloyati, Yangibozor tumani Shoirlar mahallasida yashovchi Og‘abek Yuldashev “Yoshlar daftari”ga kiritilib, unga “Ye-Auksion” orqali 30 sotix yer maydoni ajratilgan. Bugungi kunda ushbu yer maydoniga pomidor ekib, 14 mln. so‘m daromad qildi.

Shuningdek, yoshlar hayotda o‘z o‘rnini topishi hamda o‘zini o‘zi band qilishi uchun 55,5 ming nafariga 150 mlrd. so‘mlik asbob-uskunalar va mehnat qurollari ajratilgan bo‘lsa, 13 ming nafar yigit-qiz haydovchilikka o‘qishi uchun 12 mlrd. so‘m xarajat qoplab berildi. 15 ming nafar yoshlarga tadbirkorlik va kasb-hunar hamda IT, xorijiy tillarga o‘qishi uchun 28 mlrd. so‘m mablag‘ ajratildi.

Albatta, mamlakatimizda yoshlar masalasiga bu darajada katta e’tibor qaratilayotgani bejiz emas. Yoshlar yetakchilari tizimining yo‘lga qo‘yilgani esa ularning murojaatlarini mahallaning o‘zida hal etish, o‘g‘il-qizlarni manzilli qo‘llab-quvvatlash, yosh tadbirkorlar safini kengaytirish, asosiysi, mahallalardagi ishsizlikni kamaytirishga xizmat qilayotir.

“Yoshlar balansi”, “Yoshlar daftari” va “Yoshlar portali” elektron platformalariga mahalladagi har bir yoshning ijtimoiy, iqtisodiy hamda salomatlik holati yuzasidan ma’lumotlar kiritilayotgani yoshlarni qiynayotgan savollarga javob topishni yanada yengillashtirdi.

Umuman olganda, yoshlar qanchalik bilimli, kasbli va hunarli bo‘lsa, mamlakat iqtisodiyoti shuncha taraqqiy etadi. Bu borada yetakchilar yoshlarga yaqin do‘st, maslahatgo‘y va ko‘makdosh bo‘lmoqda. Ushbu tizim berayotgan samarani bugun mahallalarda tadbirkorlik rivojlanib, yangi ish o‘rinlari, doimiy daromad manbalari yaratilayotgani, barqaror ijtimoiy-ma’naviy muhit mustahkamlanib, jinoyatchilik kamayib borayotgani misolida ko‘rish mumkin.

Muhammad VALIYEV,

Oliy Majlis Qonunchilik palatasi deputati.