Har bir kun — imkoniyat, kelajak poydevori

Ma’lumki, globallashuvning o‘ziga xos yaxshi va yomon tomonlari bor. So‘nggi uch yil pandemiya va undan keyingi davrda dunyo qanday shiddat bilan keskin o‘zgarayotgani, oldindan tahlil qilib bo‘lmaydigan jarayonlar, turli mintaqalarda davom etayotgan qurolli mojarolar, shafqatsiz raqobat, savdo va investitsiya oqimlarini, tovar va xizmatlar aylanishini izdan chiqarib, oziq-ovqat va energetika xavfsizligi bo‘yicha yangidan-yangi muammolar keltirib chiqarishi natijasida global tinchlik va osoyishtalikka jiddiy putur yetmoqda.

Shuning uchun barchamiz Vatan, el-yurt manfaatini ko‘zlab Yangi O‘zbekiston degan yagona va ulug‘ maqsad atrofida yanada jipslashib, xalqimizning orzusi bo‘lgan mana shu ezgu g‘oyani amalga oshirish yo‘lida birlashishimiz kerak.

Yangi saylangan O‘zbekiston Respublikasi Prezidenti Shavkat Mirziyoyevning lavozimga kirishish tantanali marosimda iga bag‘ishlangan Oliy Majlis palatalari qo‘shma majlisidagi nutqini tom ma’noda barcha sohalarda yangilanish, tub burilish va ulkan o‘zgarishlar uchun muhim qadam, desak aslo mubolag‘a bo‘lmaydi.

Davlatimiz rahbari alohida ta’kidlab o‘tganidek, keyingi 7 yilda tadbirkorlik uchun yanada qulay imkoniyatlar yaratilib, yangi-yangi ish o‘rinlari ochish, aholi daromadlarini ko‘paytirish, yoshlar va xotin-qizlarni zamonaviy kasb-hunarlarga o‘qitish, ularning bandligini oshirish, aholining ehtiyojmand qatlamlari, nogironligi bo‘lgan shaxslar, yolg‘iz keksalarni qo‘llab-quvvatlash, kambag‘allikni qisqartirishga qaratilgan ishlarni yangi bosqichga olib chiqiladi.

Shuningdek, iqtisodiyot sohasida ham tub o‘zgarishlar, ya’ni “yashil iqtisodiyot”, “yashil energiya” tamoyillarini yanada keng joriy etilishi, ayniqsa, iqtisodiyotga kiritilayotgan investitsiyalar hajmini bir necha barobar oshirish va 2030 yilgacha yalpi ichki mahsulot hajmini 160 milliard dollarga yetkazish rejalashtirilmoqda. Bu degani, keyingi 7 yillikda yalpi ichki mahsulotning qariyb ikki barobarga oshirish, demakdir. Albatta, oldimizga qo‘yilgan ulkan marralarni zabt etish bizdan katta kuch va tinimsiz mehnatni talab etadi.

Prezidentimiz inauguratsiya marosimida ta’kidlab o‘tganlaridek, “Har bir kun – bu imkoniyat, har bir kun – bu kelajak poydevori” shior bugundan boshlab, har birimizning hayotimiz qoidasiga, har bir rahbarning, barcha xalq noiblari, vazir va hokimlarning kundalik faoliyat dasturiga aylanishi shart va zarur.

Zero, davlatimiz rahbari tomonidan ilgari surilgan takliflarning ro‘yobga chiqarilishi yurtimizning rivoji, xalqimizning farovon yashashiga xizmat qiladi.

Maqsud QURBONBOYEV,
Oliy Majlis Qonunchilik palatasi deputati