Abbosbek– “Taraqqiyot bunyodkori ” nishoni sovrindori

Keyingi paytda “Adolat” SDP Namangan shahar tashkiloti partiya Saylovoldi dasturini amalga oshirishda sezilarli yutuqlarga erishmoqda. Bunda kadrlar bilan ishlash yaxshi yoʻlga qoʻyilganligi katta samara bermoqda. Ayniqsa, yoshlarga alohida eʼtibor qaratilayotganligi diqqatga sazovordir. Koʻplab iqtidorli yigit-qizlar safimizni toʻldirmoqda. Abbosbek Usmonxoʻjayev ayni vaqtda 21 yoshda. Shunday boʻlishiga qaramay, partiyadoshlarimiz oʻrtasida katta obroʻ qozongan. Uning “Adolat” SDP faoli sifatida olib borayotgan ishlari koʻp marta eʼtirof etilgan. Hozir u shahar kengashidagi “Yosh adolatchilar” qanoti yetakchisi. Tengdoshlari ishtirokida oʻtkazilayotgan har bir tadbirga bosh-qosh. Oʻz bilim darajasini oshirishga intiladi. Universitetning tarix fakultetida sirtdan taʼlim olayotgani fikrimiz dalilidir. Darvoqe, yaqinda u Oliy Majlis Qonunchilik palatasi huzuridagi “Yoshlar parlamenti” aʼzoligiga saylandi.

  – Abbosbekning faol va tashabbuskor jamoatchi ekanligi yangilangan Konstitutsiyaga bagʻishlangan referendumga tayyorgarlik va oʻtkazish jarayonida yana bir bor koʻzga tashlandi, — deydi “Adolat” SDP Namangan shahar kengashi raisi Mirzarahmat Olimov. – U oliy oʻquv yurtlarida, mahallalarda yangi tahrirdagi Asosiy Qonun loyihasini keng targʻib qildi. Oʻnlab davra suhbatlari, uchrashuvlar va muloqotlarda qatnashdi. Bu jarayonga koʻplab partiyadoshlarimizni safarbar qila oldi. Oʻzi referendumda kuzatuvchi ham boʻldi.

Albatta, yurtimizda amalga oshirilayotgan islohotlarda, jamoatchilik hayoti uchun muhim masalalarda faol yoshlarni har qancha ragʻbatlantirsa arziydi. Bu, boshqalarni ham ulardan ibrat olishlari uchun intilishlariga sabab boʻladi. Oʻzlarini esa yanada gʻayrat bilan ishlashga daʼvat etadi. Bu borada oʻtkazilayotgan turli koʻrik-tanlovlar muhim ahamiyatga ega. Ulardan biri Oʻzbekiston ilm-fan va ilmiy-amaliy faoliyat akademiyasi taʼsis etgan “Taraqqiyot bunyodkori” koʻrik-tanlovidir.

Oʻtgan haftada Namanganda mazkur tanlovning viloyat bosqichi yakunlari chiqarildi. Gʻolib deb topilganlar orasida safdoshimiz Abbosbek Usmonxoʻjayevning borligi eʼtiborga molikdir. Unga tantanali ravishda “Kelajak bunyodkori” esdalik nishoni topshirildi.

– Kamtarona mehnatimga berilgan yuksak bahodan nihoyatda minnatdorman, — deydi A. Usmonxoʻjaev. – Bu, kuchimga kuch, gʻayratimga gʻayrat qoʻshdi. Partiyamizning gʻoya va maqsadlarini amalga oshirish uchun astoydil harakat qilaveraman.

Nurbek Abdullaev,

“Adolat” SDP Namangan viloyat Kengashi matbuot kotibi.