“Adolat” SDP Siyosiy Kengashi raisi namanganlik talaba-yoshlar bilan uchrashdi

Ayni davrda mamlakatimizda ahamiyati jihatidan nihoyatda beqiyos ijtimoiy-siyosiy jarayon — umumxalq referendumiga qizgʻin tayyorgarlik koʻrilmoqda. Joylarda yangi tahrirdagi Oʻzbekiston Konstitutsiyasi loyihasini targʻib qilish boʻyicha koʻpdan-koʻp tadbirlar oʻtkazilmoqda. Bunda “Adolat” sotsial-demokratik, partiyasi vakillari — faxriylar, faollar, deputatlar ham qatnashmoqdalar.

2023-yil 6-aprelda Namangan davlat universiteti katta majlislar zalida tashkil etilgan tadbir ham yuqorida tilga olingan mavzuga bagʻishlandi. Unda Oʻzbekiston “Adolat” SDP Siyosiy Kengashi raisi Bahrom Abduhalimov, partiyaning viloyat, shahar va tuman kengashlari raislari, xalq deputatlari mahalliy kengashlarining deputatlari, “Ayollar” va “Yosh adolatchilar” qanotlarining faollari, universitet professor-oʻqituvchilari, talabalar, keng jamoatchilik va ommaviy axborot vositalari vakillari ishtirok etdilar.

“Konstitutsiyaviy islohotlar – inson shaʼni va qadr-qimmati uchun” deb nomlangan davra suhbatini “Adolat” SDP viloyat kengashi raisi Isroiljon Joʻrayev olib bordi.

Tadbirni Oʻzbekiston “Adolat” SDP Siyosiy Kengashi raisi Bahrom Abduhalimov, kirish soʻzi bilan boshlab berdi. Partiya yetakchisi yangi tahrirdagi Asosiy qonun loyihasi xalqimizning faol ishtirokida tayyorlanganligi, 220 mingdan ortiq taklif va mulohazalarda bildirilgan fikrlar oʻz ifodasini topganligini qayd etdi.

Jarayonda taʼkidlanganidek, yangi tahrirdagi Konstitutsiya loyihasini umumxalq ijodining mahsuli sifatida baholash mumkin. Boisi unda jamiyatimizdagi barcha tabaqalarining manfaatlari toʻla hisobga olingan, belgilanayotgan normalar fuqarolarimizning huquq va burchlari uygʻunligini taʼminlashga xizmat qiladi.

Shuningdek, jarayonda Oliy Majlis Qonunchilik palatasi deputati Dilmurod Ismoilov “Ijtimoiy davlat inson huquq va manfaatlari koʻzgusi”, NamDU rektorining birinchi oʻrinbosari Narimon Dehqonov “Xalq — konstitutsiyaviy islohotlar tashabbuskori” mavzularida maʼruzalari tinglandi. Ular yangilanayotgan Konstitutsiyada inson qadr-qimmati eng asosiy masala etib belgilanganini taʼkidladilar. Bosh Qomusimizga kiritilayotgan oʻzgartishlarning mazmun-mohiyati, ilm-fan, taʼlim rivojiga oid muhim jihatlari, huquqiy-demokratik jamiyatni barpo etishdagi muhim omillar, inson qadri tamoyilini yanada mustahkamlash, ayniqsa, yoshlar masalasiga doir kiritilayotgan oʻzgartirishlar Oʻzbekistonning ijtimoiy davlatga aylanishiga zamin boʻlishini misollar bilan izohladilar.

Shundan soʻng soʻzga chiqqan Namangan davlat universiteti tabiiy fanlar fakulteti dekanining oʻrinbosari Abdulbosit Sobirxonov, Oliy Majlis Qonunchilik palatasi huzuridagi “Yoshlar parlamenti” aʼzosi Nozima Akbarova, xalq deputatlari Pop tuman kengashi deputati Maftunaxon Mamatova Konstitutsiyaga kiritilayotgan oʻzgarishlar jamiyat hayotini yanada demokratlashtirish, har bir fuqaroning huquq va erkinliklarini toʻliq kafolatlashini bayon etdilar. Bu, “Adolat” SDPning Saylovoldi dasturida olgʻa surilgan gʻoya va maqsadlar bilan hamohangligi taʼkidlandi.

Tadbir qatnashchilari barchani shu yil 30-aprelda oʻtkaziladigan umumxalq referendumida faol qatnashishga chaqirdilar.

Davra suhbati davomida ishtirokchilar oʻzlarini qiziqtirgan savollarga batafsil javoblar oldilar.

Nurbek ABDULLAYEV,
“Adolat” SDP Namangan viloyat
Kengashi matbuot kotibi.