“Adolatchilar” inson qadrini ulugʻlaydi

Yangilangan Konstitutsiyamizda qayd etilganidek, inson, uning hayoti, erkinligi, qadr-qimmati, daxlsiz huquqlari va manfaatlarini soʻzsiz taʼminlash davlatimiz siyosatining asosini tashkil etadi. Amalga oshirilayotgan barcha islohotlar “Inson qadri uchun” ezgu gʻoyasini roʻyobga chiqarishga yoʻnaltirilgani eʼtiborli. Bu xalqimiz tomonidan qoʻllab-quvvatlanyapti. Oʻzbekiston “Adolat” SDP faoliyatida ham mazkur vazifaga alohida eʼtibor qaratilmoqda.

Partiyaning Izboskan tuman kengashi tomonidan 1-son kasb-hunar maktabida “Inson qadri ulugʻlangan yurt” loyihasi doirasida oʻtkazilgan tadbirda yuqoridagilar oʻz ifodasini topdi. Turli sohalarda samarali faoliyat yuritib, katta tajriba orttirgan, mehnatlari davlatimiz tomonidan munosib baholangan va bugun chin maʼnoda ustozga aylangan partiya faollari yoshlarga oʻz tajribalari, erishgan yutuqlari va davlatimizning bugungi siyosati haqida gapirdilar. Oʻz oʻrnida bugungi yoshlarning baxti, ularga boʻlgan eʼtibor taʼkidlab oʻtildi. “Moʻtabar ayol” koʻkrak nishoni sohibasi S Ashurova, Zulfiya nomidagi davlat mukofoti nishondori D. Shodmonova, “Shuhrat”medali sohibasi A.Ismatovalar ishtirokchilarni qiziqtirgan savollariga javob berdilar.

Dilfuza Ahmedova, xalq deputatlari Izboskan tuman kengashi deputati:

-Mamlakatimizda har bir inson baxtiyor yashashga, hech kimdan kam boʻlmasdan hayot kechirishga haqlidir, degan gʻoya xalqimizni ulugʻ maqsadlar sari boshlamoqda. Ijtimoiy davlatda hech kim eʼtibordan chetda qolmaydi, muammolari bilan yolgʻiz tashlab qoʻyilmaydi. Biz “adolatchilar” ayni shu maqsadda jamoatchilik orasiga kirib borib, inson qadri va uning ulugʻligini tushuntiryapmiz. Toki yurtdoshlarimizda shu vatanga boʻlgan muhabbat yuksalsin.

Tadbir yakunida jamiyatimiz rivojiga qoʻshgan hissasi uchun bir guruh faollarga “Adolat”SDP tuman kengashining tashakkurnomalari taqdim etildi.

“Adolat” SDP Andijon viloyati kengashi

Matbuot xizmati.