Advokatlarni elektron tizim orqali tanlash tartibi joriy etilmoqda

Oliy Majlis Qonunchilik palatasidagi “Adolat” SDP fraksiyasining yig‘ilishida “Davlat hisobidan yuridik yordam ko‘rsatish to‘g‘risida”gi O‘zbekiston Respublikasi Qonuni qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish haqida”gi qonun loyihasi birinchi o‘qishda ko‘rib chiqildi.

Ta’kidlanganidek, so‘nggi yillarda mamlakatimizda inson huquqlari va manfaatlarini so‘zsiz ta’minlash, fuqarolarning odil sudlovga erishish darajasini yanada oshirish va malakali yuridik yordam olishga bo‘lgan huquqlari kafolatlarini kuchaytirishga doir tizimli ishlar olib borilmoqda. “Davlat hisobidan yuridik yordam ko‘rsatish to‘g‘risida”gi O‘zbekiston Respublikasi Qonuni qabul qilinib, fuqarolarga Konstitutsiyada kafolatlangan malakali yuridik yordam olish huquqidan to‘liq foydalanish imkoniyati yaratildi.

Shuningdek, sud ishini yuritishning barcha bosqichlarida tomonlar tortishuvi prinsipining lozim darajada ishlashini tashkil etishga qaratilgan chora-tadbirlar izchil amalga oshirilib, advokatlarning professional faoliyatini bajarishi uchun zarur qonunchilik bazasi yaratildi.

Taklif etilayotgan qonun loyihasining maqsadi jismoniy shaxslarga O‘zbekiston Respublikasi Konstitutsiyasi va xalqaro shartnomalar bilan kafolatlangan o‘z huquq va qonuniy manfaatlarini ro‘yobga chiqarish hamda himoya qilish uchun zarur bo‘lgan barqaror va ishonchli davlat hisobidan yuridik yordam ko‘rsatish tizimini yaratish, yuridik yordam olish va odil sudlovga erishishda teng imkoniyatlardan foydalanishni ta’minlashdan iborat.

Ushbu hujjatga ko‘ra, davlat hisobidan yuridik yordam ko‘rsatiladigan ishlar ro‘yxatiga fuqarolik va ma’muriy ishlarni kiritish orqali fuqarolarning bepul yuridik yordam olish imkoniyatlari kengaytirilmoqda. Shuningdek, axborot-kommunikatsiya texnologiyalarini joriy etgan holda davlat hisobidan yuridik yordam ko‘rsatadigan advokatlarni inson omilisiz elektron tizim orqali tasodifiy tanlash tartibi joriy etilyapti.

Qonun loyihasining qabul qilinishi fuqarolarning odil sudlovga erishish darajasini yanada oshirish va malakali yuridik yordam olishga bo‘lgan kafolatlarini kuchaytirishga, shuningdek, mamlakatning tegishli xalqaro reytinglar, shu jumladan Huquq ustuvorligi (Rule of law) indeksidagi o‘rnini yaxshilashga xizmat qiladi.

Yig‘ilish davomida deputatlar tomonidan partiya pozitsiyasidan kelib chiqqan holda ko‘tarilgan savollarga qonun tashabbuskorlari va soha-mutaxassislaridan atroflicha javoblar olindi.

Fraksiya a’zolari qonun loyihasining nihoyatda dolzarbligi, ayni chog‘da juda zarurligini, ayniqsa, hujjatda aks etayotgan yangiliklar “Adolat” SDP g‘oya va maqsadlariga hamohangligini e’tiborga olib, uni qo‘llab-quvvatladilar.