Aholi bandligi endi davlat himoyasida

Shu yilning 30-aprel kuni respublikamizda boʻlib oʻtadigan referendumda yurtdoshlarimiz faol ishtirok etishini bildirmoqda. Bu bejiz emas. Shu kuni Oʻzbekistonimiz va xalqimizning bundan keyingi hayotining qonuniy asosi boʻlgan yangilanayotgan Konstitutsiyamiz oʻz tasdigʻini topadi. Unda koʻpdan kutilgan oʻzgarishlar oʻz aksini topganligi eʼtiborli.

Shu oʻrinda aytish mumkinki, aholi bandligi hamma vaqt dolzarb vazifalardan boʻlib kelgan. Bu borada aniq tizim Yaratilganiga qaramay fuqarolar bandligini toʻla taʼminlashga erishilmayotganidan koʻz yumish qiyin. Aslida jamiyatda bir nafar fuqaroning ishsizligi ham katta muammo. Chunki uning ortida oʻzi bilan birga oila aʼzolari ham bor.

Yuqoridagilardan kelib chiqib, yangilanayotgan Konstitutsiyamizda mazkur masala qonunan mustahkamlanmoqda. Aniqroq qilib aytganda, bu vazifani davlat oʻz zimmasiga olyapti. 43-moddada “Davlat fuqarolarning bandligini taʼminlash, ularni ishsizlikdan himoya qilish, shuningdek, kambagʻallikni qisqartirish choralarini koʻradi. Davlat fuqarolarning kasbiy tayyorgarligini va qayta tayyorlanishini tashkil etadi hamda ragʻbatlantiradi”, deya belgilab qoʻyildi.

Albatta bu yaxshi. Davlat nafaqat ish bilan taʼminlaydi, himoya qiladi va maʼlum bir kasbga ham yoʻnaltiradi. Hatto 42-moddaga asosan har kim munosib mehnat qilish, kasb va faoliyat turini erkin tanlash, xavfsizlik va gigiyena talablariga javob beradigan qulay mehnat sharoitlarida ishlash, mehnati uchun hech qanday kamsitishlarsiz hamda mehnatga haq toʻlashning belgilangan eng kam miqdoridan kam boʻlmagan tarzda adolatli haq olish, shuningdek, ishsizlikdan qonunda belgilangan tartibda himoyalanish huquqiga ega. Qolgani endi fuqaroning oʻz qoʻlida.

Bir soʻz bilan aytganda, yangilangan Konstitutsiya jamiyatimiz hayotining barcha yoʻnalishlarini kompleks tartibga solish hamda mamlakatimizni demokratik rivojlantirish yoʻlida eng muhim huquqiy poydevor boʻlib xizmat qiladi. Konstitutsiyaviy qonun loyihasiga kiritilgan yangi normalar barcha sohalarni taraqqiy ettirishga xizmat qiladi.

Oltinoy MAMIROVA,
Oliy Majlis Qonunchilik palatasi deputati.